Şamaxı - Zirə 0:2 (0:1)
1. Rikardo Fernandes - 5,5
4. Adil Nağıyev (k) - 5,0
8. İlkin Muradov - 5,0
(10. Emin Zamanov, 71) - 4,5
17. Rafael Məhərrəmli - 5,0
(24. Edqar Adilxanov, 71) - 4,5
5. Arsen Ağcabəyov - 5,0
(11. Conatan Benteke, 76) - qiymətsiz
82. Rüfət Abbasov - 5,0
20. Leroy Mikels - 6,0
93. Brahim Konate - 5,5
7. Georgi Kantariya - 5,0
9. Belajdi Pusi - 5,5
66. Vasiliye Bakiç - 5,5
Ehtiyat oyunçular
85. Kamal Bayramov
62. Abdulla Seydəhmədov
60. Səbayıl Bağırov
80. Zahid Mərdanov
13. Ramin Əhmədov
6. Rauf Rüstəmli
22. Qurban Səfərov
19. Fəxri Məmmədli
Baş məşqçi: Ayxan Abbasov
Komandanın ən yaxşısı: Leroy Mikels

13. Aydın Bayramov - 6,0
7. Məqsəd İsayev - 5,5
29. Ceyhun Nuriyev - 5,5
(3. Ange Mutsinzi, 86) - qiymətsiz
22. İldar Alekperov - 5,5
5. Stefan Aka - 6,0
4. Ruan Renato (k) - 6,0
90. Davit Volkov - 6,5
(24. Yusuf Laval, 72) - qiymətsiz
15. Pyer Zebli - 5,5
18. Martins Junior - 6,0
(23. Rafael Utziq, 62) - 5,5
17. Ayron Qomis - 5,0
(6. Eldar Quliyev, 72) - 4,5
19. Salifu Suma - 5,5
(11. Rüstəm Əhmədzadə, 62) - 5,0
Ehtiyat oyunçular
97. Tyaqo Silva
41. Anar Nəzirov
21. Hacıağa Hacılı
8. İsmayıl İbrahimli
16. Fuad Bayramov
14. Elçin Əlicanov
10. Giorgi Papunaşvili
Baş məşqçi: Rəşad Sadıqov
Komandanın ən yaxşısı: Martins Junior

Qollar: M.Junior, 33 (0:1, D.Volkov). V.Bakiç, 63-öz qapısına (0:2).
Vərəqələr: C.Nuriyev, 24 (qeyri-idman hərəkəti). M.Junior, 26 (qeyri-idman hərəkəti). İ.Muradov, 29 (qeyri-idman hərəkəti). B.Pusi, 47 (hakimin qərarına etiraz). B.Konate, 60 (qeyri-idman hərəkəti) - sarı.
Hakimlər: İNQİLAB MƏMMƏDOV, Namiq Hüseynov, Rahil Ramazanov, Fərid Hacıyev (hamısı Bakı).
VAR hakimi: Rəşad Əhmədov (Mingəçevir).
VAR hakiminin köməkçisi: Eyyub İbrahimov (Bakı).
Hakim-inspektor: İmanxan Sultani (Bakı).
AFFA nümayəndəsi: Mübariz Hüseynov (Gəncə).
2 noyabr. Şamaxı. Şəhər stadionu. 1000 tamaşaçı (2200 yerlik).
Birinci hissəyə 1, ikinci hissəyə 5 dəqiqə əlavə olunub.
Oyunun qiyməti: 6,0.

"Şamaxı"nın yeni mövsüm ərzində "doğma divarlar" arasında keçirdiyi oyunların hamısı maraqlı keçib. Təkcə ona görə yox ki, yerli azarkeşlər komandaya yiyə durur, əvvəldən sona qədər qələbəyə səsləməkdən yorulmur. Səbəb həm də odu ki, "şirlər" evdə "Neftçi", "Sumqayıt", "Turan Tovuz" və "Araz-Naxçıvan" kimi iddialı rəqiblərə qarşı cəsarətli oyunla diqqəti çəkib. Şənbə günü keçirilən oyunda isə qonaq "Zirə" idi. Söhbət avrokuboklara iddialı, son üç oyunda qələbəyə həsrət qalan "qartallar"dan gedir. Düzdü, ilk "üçlük"də yer alan "Qarabağ", "Turan Tovuz" və "Araz-Naxçıvan"ın xal ehtiyatını artırması qəsəbə təmsilçisini matça daha ciddi yanaşmağa vadar etdi. Lakin "Şamaxı"nın asanlıqla təslim olduğunu desək, yanılarıq. Hətta ilk təhlükəli vəziyyəti meydan sahibləri yaratdı. "Şirlər" 7-ci dəqiqədə hesabı açmağa yaxın idi. Sadəcə, Pusi Renatonun təzyiqindən xilas ola bilmədi və tələsik "çərçivə"ni nişan almağa çalışması qeyri-dəqiq zərbəylə nəticələndi. Qonaqların fərqlənmək istəyi isə özünü 22-ci dəqiqədə büruzə verdi. Adilin topu itirməsindən yararlanan Martins irəliləyib Volkova ötürmə verdi. Cərimə meydançasına daxil olandan sonra bəxtini sınayan gürcünün hesabı açmasına Rikardo imkan vermədi. Portuqaliyalı qapıçı bir qədər sonra Sumanın istəyinə də mane oldusa, Martinsin öhdəsindən gələ bilmədi. Daha doğrusu, Junior 33-cü dəqiqədə Volkovun göndərdiyi topu tora qovuşdurdu. Maraqlıdı ki, bir qədər sonra yenidən eyni epizoda şahidlik etdik. Burda fərq ondan ibarət idi ki, Rikardo Davitin ötürməsi sayəsində dubl müəllifi olmaq istəyən Martinsə bu dəfə "yox” dedi.

İkinci hissə birinci ilə müqayisədə daha hərəkətli keçdi. Ən azı hesabı bərabərləşdirmək istəyən "Şamaxı"nın bir neçə cəhdini izlədiksə, "Zirə" fərqi artırmaq üçün əlindən gələni əsirgəmədi.

55-ci dəqiqədə Mikels cərimə zərbəsindən topu birbaşa qapıya göndərmək istəsə də, Aydın əla seyvlə yadda qaldı. "Zirə"nin fərqi artırması isə avtoqol sayəsində mümkün oldu. Utziqin künc zərbəsi vasitəsilə cərimə meydançasına çatdırdığı "kürə" uğrunda mübarizə zamanı qarışıqlıq yarandı. 63-cü dəqiqədə Bakiçin təhlükəni sovuşdurmaq "cəhd"i hesabın dəyişməsiylə nəticələndi. İş orasındadı ki, Renato topa Bakiçdən əvvəl toxunduğu üçün qolu özünün vurduğunu zənn etdi. Bir qədər sonra Mikels yenə uzaqdan birbaşa qapıya zərbə ilə fərqi azaltmaq istədi. Bu dəfə də Aydın yerində idi. Leroy çox keçmədən eyni cəhdi təkrarladı ki, "kürə" tirin üstündən keçdi. Nəhayət, "Şamaxı" 82-ci dəqiqədə topu tora qovuşdura bildi. Daha doğrusu, Aydın Emin və Konatenin ardıcıl zərbələrini zərərsizləşdirdisə, Pusi qapıçının yerdə, "kürə"nin meydanda qalmasından istifadə etdi. Sadəcə, VAR monitoruna yaxınlaşan İnqilab Məmmədov qolu saymadı. Ona görə ki, Benteke oyundankənar vəziyyətdə idi.

88-ci dəqiqədə "Zirə"nin üçüncü qolu qeydə alına bilərdi. Təbii ki, Rikardo İldarın ötürməsi sayəsində fərqlənmək istəyən Rüstəmə mane olmasaydı. Matç Lavalın qeyri-dəqiq zərbəsinin ardından başa çatdı. Beləliklə, "Şamaxı" ardıcıl dördüncü oyunda qol vurmadan uduzdu. Belədə “şirlər”in qələbə həsrəti beş matça yüksəldi. "Zirə" isə "avrokuboklar zonası"ndakı yerini möhkəmləndirdi.

Gözdən qaçmadı
// Azarkeşlərdən biri "Şamaxının yeni dünya çempionu, yunan-Roma güləşçimiz Ülvi Qənizadə, səninlə fəxr edirik" sözlərinin yazıldığı pankart açdı. Xatırladaq ki, Ülvi finalda fransalı rəqibi İbrahim Qanemi məğlub edərək (3:2) "qızıl" qazanıb.
// Şamaxılı tərəfdarlardan biri tribunadan qışqıraraq Rəşad Sadıqova "legionerlər sayəsində qələbə qazanırsız" dedi, mütəxəssisin cavabı belə oldu: "sizin də legionerləriniz var da".
// "Qartallar" fanklubu 5 nəfərlə tribunada idi. "Şamaxı"nı yalnız sıravi azarkeşlər dəstəklədi.

KƏNAN BAHADIR