“Səfərə çıxana qədər Bakıda üç gün hazırlşadıq. 25 futbolçu dəvət etmişdim. Toplanış zamanı iki futbolçuda zədə, yəni yüngül ağrı hiss etdik və dərhal onları məşqdən ayırdıq ki, zədələri daha da ağırlaşmasın. 23 futbolçu ilə səfərə yollandıq. Məqsədimiz futbolçuları beynəlxalq oyunlarda sınamaqdı. Bəzi oyunçular ilk dəfə belə oyunda iştirak edirdi. Futbolçular haqqında daha çox informasiya almaq istəyirdik. İlk oyunlar həmişə gənclər üçün bir qədər çətin olur. Həm meydan, həm də rəqib amili vardı. Monteneqro ilə ilk yoxlama görüşündə məğlub olduq. Buna baxmayaraq, oyunçularım çox istəkli, döyüşkən idi, verdiyimiz tapşırıqları maksimum yerinə yetirməyə çalışdılar. Ümumiyyətlə, ilk oyundakı nəticədən olmasa da, ümumilikdə oyundan razı qaldım. İkinci matçda uşaqlar daha inamlı, daha istəkli oynayaraq qələbə qazandı. Həmin görüşdə də bəzi oyunçuları sınaqdan keçirdik. Qarşıda bir toplanışımız da var. Bu il məqsədimiz daha çox futbolçunu sınamaq, onlar haqda geniş informasiya almaq idi. Belə rəqiblərlə oynamaq futbolçulara çox faydalı olur. Həm beynəlxalq təcrübəni, həm də oyunçuların keyfiyyətini artırır. Eləcə də biz məşqçilərə həm futbol, həm də nələr üzərində işləyəcəyimiz barədə məlumat verir. Düşünürəm ki, ümumilikdə toplanışdan, futbolçuların münasibətindən razı qaldım. Amma üzərində işləyəcəyimiz çox şey var”.