Füzuli Məmmədov Sloveniyaya da uduzdu və yenə danışmadı
Son iki həftə aşağı yaş qrupu yığmalarımız üçün yaxşı keçmədi. Əvvəlcə Özbəkistanın paytaxtı Daşkənddə təlim-məşq toplanışında olan U-19 millimiz orda yerli həmyaşıdlarına qarşı keçirdiyi iki yoxlama matçında uduzdu – 0:3, 0:4.
Füzuli Məmmədovun rəhbərlik etdiyi U-17 isə oktyabrın 21-də Avropa çempionatının seçmə mərhələsində mübarizəyə başladı. İlk oyunda meydan sahibi Serbiayaya uduzduq (1:5) və Füzuli bəy dedi ki, qoy Sloveniya ilə oyun da olsun, danışırıq. Əlbəttə, adamın niyyəti qələbə qazanandan sonra ürəyini boşaltmaq idi. Ancaq olmadı – srağagün Sloveniya da qapımızdan üç cavabsız top keçirdi. Qrupun digər oyununda isə Serbiya Lüksemburqu darmadağın edib – 3:0. Hazırda qrupda belə vəziyyət formalaşıb:
1. Serbiya 3 2 0 0 8-1 6
2. Sloveniya 2 1 1 0 4-1 4
3. Lüksemburq 2 0 1 1 1-4 1
4. Azərbaycan 2 0 0 2 1-8 0
Sloveniyaya və Serbiya yığmalarına uduzduq. Görəsən, gələcək ümidimiz sayılan aşağı yaşlıların belə fiasko yaşamasının səbəbi nədi? Füzuli Məmmədov nədənsə yenə də susdu. Belədə bu sualı uzun illər yığmamızın şərəfini qorumuş, hazırda isə “Sumqayıt”ın akademiyasında işləyən Vaqif Cavadova ünvanladıq:
“Mən bunu həmişə demişəm ki, günahkar baş məşqçilər deyil. Son vaxtlar uşaq futboluna diqqət ayırırıq. Bu da xüsusi məqamdı. Lakin infrastruktur baxımından geri qalırıq. Düzdü, milli komandaya gələn oyunçulara hər cür şərait yaradılır. Ancaq klublarda belə olmur. Söhbət futbolçunun geyimindən və həyat tərzindən getmir. Məşq prosesi, meydança əsasdı. Süni və təbii örtüklü stadionda oynamaq arasında böyük fərq var. Yığmaya gələn oyunçu 5-10 gün toplanışda olur, amma klubunda daim çıxış edir. Buna görə də uşaqların yaxşı hazırlıq keçməsi öz oynadıqları komandalarından asıldı. Burdakı məşqçilər futbolçular üzərində yaxşı işləməlidi ki, sabah yığmaya cəlb olunanda keyfiyyətli oyun nümayiş etdirsinlər. Bir də burda alınan nəticələr o qədər də vacib deyil. Çünki əsas məqsəd yığma üçün perspektivli futbolçular yetişdirməkdi. Məğlubiyyətlərə gəlincə, bunları yığmanı çalışdıran mütəxəssislər daha yaxşı bilər”.
CAVİD ƏLİYEV
Digər xəbərlər
