David Alaba 2023-cü ilin dekabrından bəri oynamır - avstriyalı zədə üzündən karyerasını bitirə bilər
Ardıcıl ikinci mövsümdə “Real”ın aparıcı oyunçularını zədə epidemiyası izləyir: ötən ilin avqustunda Kurtua məşqdə xaçvari bağları qırdı, Eder Militao üç gün sonra “Atletik”lə oyunda eyni şeyi etdi. Arda Gülər iyuldan ilin sonuna qədər müalicə olundu, Çuameni oktyabrda pəncəsini zədələdi, Vinisius Junior budundakı problem üzündən dəfələrlə sıradan çıxdı.
Komanda bütün bu çətinliklərin öhdəsindən gəldi – İspaniya çempionluğunu və Çempionlar Liqasını qazandı, bütün adı çəkilən futbolçular isə yüksək səviyyəsinə döndü. Braziliyalı vinger zədədən sonra elə möhtəşəm təsir bağışladı ki, yaxın günlərdə “Qızıl top”u alacağı belə şübhə doğurmur. Ancaq xoş olmayan tarixçələr də var. Ötən il dekabrın 17-də “Real” La Liqa çərçivəsində “Vilyarreal”ı qəbul etdi. Oyun hələ ilk yarıda meydanı tərk etməli olan David Alaba üçün faciəvi bitdi – adi bir toqquşmadan sonra dizini tutdu. Müdafiəçi həkimlərin müşayiəti ilə meydandan ayrıldı, sol ayağını yerə basa bilmirdi. Klub bir neçə saatdan sonra müayinənin nəticəsini açıqladı: xaçabənzər bağın qırılması.
Növbəti gün avstriyalı vətənində - İnsbrukda əməliyyat olundu. Həkimlər 9 aylıq bərpa dövrü planlaşdırdı. Bu isə o demək idi ki, müdafiəçi həm mövsümün qalan hissəsini, həm də Avstriya yığmasının onda artıq vəsiqəni təmin etdiyi Avropa çempionatını buraxacaq. Sonradan aydın oldu ki, bu, hələ nikbin proqnoz imiş.
Bərpa uzanır
Tezliklə bərpa prosesinin ləngiyəcəyi aydın oldu. Onun dizi gözləniləndən daha gec sağalırdı. İspaniyanın əksər media qurumları, o cümlədən “Marca” və “Relevo” da müntəzəm bu haqda yazırdı. “Real” isə ictimaiyyət önündə Alabanı dəstəkləyir, onun komandadakı gələcəyi ilə bağlı nəticə çıxarmağa tələsmirdi. Hərçənd müqavilə müddətinin bitməsinə iki ildən də az qalırdı.
Futbolçu da özünü kollektivdən ayrı tutmurdu: komandası “Bavariya”nı Çempionlar Liqasının yarımfinalında sıradan çıxarandan sonra bayramlaşanlar arasında idi, hamı ilə birgə Kroosu təqaüdə yola saldı, almaniyalı üçün açılan şərəf dəhlizində yer aldı. Maraqlıdı ki, futbolçu “Barsa”dan da xoş sözlər eşitdi. Çünki 7 il Davidlə Münhen klubunun paltardəyişmə otağını bölüşən Levandovski orda oynayır. Polşalı sosial şəbəkədə dostuna “güclü ol” mesajını göndərdi.
Madrid klubunun məlum reaksiyası həm də ona görə cəlbedici ki, avstriyalı onda əməkhaqqına görə bütün İspaniyada 2-ci yerdə idi – ildə 22,5 milyon avro. Ondan çox qazanan yalnız Levandovski idi, yayda isə Mbappe də bu siyahıya düşdü, Alabanı 3-cü pilləyə saldı.
2021-ci ildə məhz pulun Alabanın “Bavariya”dan “Real”a keçidində əsas amil olduğunu deyirdilər – axı qazancı ikiqat artmışdı. Münhenlilərin sabiq oyunçusu Yürgen Koler də bu nəzəriyyəni dəstəkləyənlərdən idi:
“O, “Bavariya”nı pul üzündən tərk edir, mən onu anlaya bilirəm. Davidin 28 yaşı var, uzunmüddətli müqavilə istəyir. Zamanında mən də “Bavariya”dan “Yuventus”a pula görə keçmişəm. Əlbəttə, şəxsi inkişaf baxımından da keçid faydalı idi, ancaq bu, mənim ilk niyyətim deyildi. Bilirəm ki, belə desəydim, başqalarının gözünə gözəl görünəcəkdim. Futbolçu ömrü qısadı, bu üzdən Alabanı tam anlayıram”.
David isə başqalarının gözünə yaxşı görünmək istəyirdi, bu üzdən transferi belə əsaslandırdı:
“Hansısa dönəm başa çatanda həmişə çətindi. Sirr deyil ki, “Bavariya”da özümü evdəki kimi hiss edirəm. Klubdan göz yaşı içində gedirəm, ancaq eyni zamanda gələcəyə baxıram. Yeni nəyisə sınamağa, irəli addım atmağa qərar verdim. Güclü olmaq üçün rahatlıq zonasını tərk etmək lazımdı. Böyümək üçün bəzən məchulluğa doğru addım atmaq lazım gəlir”.
2024-cü ilin oktyabrı “Real”a müdafiəçinin durumu ilə bağlı bəd xəbərlər gətirdi. Oktyabrın 10-da Davidin yalnız yanvarda meydana qayıdacağı ilə bağlı şayiə yayıldı, cəmi 4 gün sonra isə Avropadakı bir neçə qaynaq hər kəsi şoka saldı: 32 yaşlı Alaba karyerasını bitirə bilər. Son məlumatlara görə, futbolçunun orqanizmi davam gətirmir. Deyirlər ki, avstriyalı heç də ağır olmayan yüklənmələr zamanı dözülməz ağrılar hiss edir. Dizdəki sümüklər bir-birinə sürtülür, kobud desək, onların arasında qığırdaqdan heç nə qalmayıb, tam dağılıb. Lakin sonradan insayderlər futboldan birdəfəlik gedişi ilə bağlı şayiələri təkzib etdilər.
Təəssüf ki, son illərdə müxtəlif səbəblər üzündən hələ oynamalı olan çoxlu ulduz itirmişik: Eden Azar, Toni Kroos, Qaret Beyl, Serxio Aquero, Tyaqo Alkantara. İnanmaq istərdik ki, Alaba bu siyahını zənginləşdirməyəcək. David 30 yaşını tamamlayandan sonra da zərrəcə geriləməmişdi, Madriddə özünü yaxşı göstərirdi. Sərhədsiz universallığın və sabitliyin üzərinə təcrübə də əlavə olunmuşdu, Karlo Ançelotti onu yüksək dəyərləndirirdi. Klub ona bu qədər çox pulu boş-boşuna ödəmir ki... Avstriyalı böyük çətinlikləri arxada qoyub Giqqzin top-liqalardakı çempionluq sayına görə rekordunu təkrarlasaydı, gözəl olardı. Bunun üçün cəmi bir titul qazanmaq lazımdı. Nəgəng stimuldu.
La Liqanın ən yüksək ödənişi oyunçuları
oyunçu klub maaşı*
Robert Levandovski Barselona 33,33
Kilian Mbappe Real 31,25
David Alaba Real 22,5
Cud Bellingem Real 20,83
Yan Oblak Atletiko 20,83
Vinisius Real 20,83
Frenki de Yonq Barselona 19
Federiko Valverde Real 16,67
Tibo Kurtua Real 15
Antonio Rüdiger Real 14,58
Eder Militao Real 14,58
* - illik qazanc (milyon avro ilə).
Digər xəbərlər
