“Sabah” ardıcıl üçüncü oyunda da uduzdu - “Baş məşqçimizə güvənirik”
Kişi basketbolçular arasında ölkə çempionu “Sabah”ın hər oyunu haqda icmalımız artıq elegiyaya bənzəyir. “Bayquşlar” məğlubiyyətləri sıralayır, onların litvalı baş məşqçisi Rimas Kurtinaytis isə bəhanələri...
Çərşənbə günü FİBA Avropa Kubokunun G qrupunda yer alan paytaxt klubunun rəqibi “Norçepinq” idi.
Sabah – Norçepinq Dolfins (İsveç) 70:74 (16:17, 24:18, 14:22, 26:27)
Sabah: Kam’ron Blu (6 xal), Trevon Düval (4), Hassani Qravett (20), Maykl Holton (15), Klavs Kavars (12), Andrey Voynaloviç (8), Şirzad Şirzadov, Artyom Butyankov (5) – Əlikamran Məmmədov, Ramiz Quliyev, Aydın İbrahimov, Tariyel Yusifzadə.
Həmin gün qrupda daha bir oyun keçirilib: Spiru (Belçika) – Marussi (Yunanıstan) 79:69 (20:18, 20:19, 23:15, 16:17).
1. Spiru 3 3 0 258-235 6
2. Marussi 3 2 1 250-229 5
3. Norçepinq 3 1 2 239-266 4
4. Sabah 3 0 3 221-238 3
Xatırladaq ki, “Sabah” ilk iki turda səfərdə “Spiru”ya (81:82), evdə isə “Marussi”yə uduzmuşdu (70:82). Növbəti turun oyunları oktyabrın 30-da keçiriləcək: Sabah – Spiru, Norçepinq – Marussi.
Rimas Kurtinaytisin oyunsonrası fikirləri:
“Yaxşı oynadıq, mübarizə apardıq, ancaq sonda lazım olanı edə bilmədik. Cərimə atışlarını xala çevirə bilmirik və bir-iki xal fərqi ilə uduzuruq. Adi vəziyyətlərdə top itiririk. “Norçepinq”lə Türkiyədəki oyunda Deandre 28 xal toplamışdı. Ancaq bu gün yox idi. Oyundan əvvəl 80 xal toplamağa borclu olduğumuzu demişdim. Türkiyədə də bu komanaya 4 xal fərqi ilə uduzmuşduq, burda da elə uduzduq. Çalışmaq lazımdı. Bizim üçün hər oyun son vacibdi. Bəlkə də təcrübə çatmır. Mən turnir cədvəlinə baxmıram, hər oyunda qalib gəlmək istəyirəm. İki oyunda qalib gəlsək, şans olacaq. Deandre ilə Poladxanlı aparıcı oyunçularımızdı, ancaq zədə üzündən oynaya bilmirlər”.
Klavs Kavars:
“Nəticədən narazıyıq. Oyunun sonunda təşəbbüsə malik olsaq da, son anda onu əldən verdik və məğlub olduq. Bəzi oyunlarda ribaundlarda pis oynayırıq, bəzilərində, sadəcə, səbətə topu pis atırıq”.
Mikko Riipinen, “Norçepinq”in baş məşqçisi:
“Vacib qələbə qazandıq. Avrokuboklarda oynamaq həmişə çətindi, xüsusən də səfərdə. Sonda yaxşı təsir bağışladıq. Bu qələbəyə komanda şəklində nail olduq”.
Dünən “Sabah”ın icraçı direktoru İlqar İsrafilovla əlaqə saxlayaraq, məğlubiyyət seriyası haqda fikirlərini öyrəndik:
“Özünüz də gördüyünüz kimi, məğlub olduğumuz oyunların əksərində hesabda öndə olmuşuq. Lakin sonda qələbəni əldən vermişik. Sona 1 dəqiqə qalmış hesabda üstünlüyü qoruyub saxlaya bilmədik. Uğursuz çıxış etdiyimizi deməzdim. Sadəcə, rəqiblərlə müqayisədə rotasiya imkanlarımızın məhdud olması sonda təsirini göstərir. FİBA-nın reqlamentinə əsasən 12 oyunçudan 7-si legioner, 5-i isə yerli olmalıdı. Səmimi desək, rəqib komandaların yerli basketbolçuları bizim basketbolçulardan bir qədər üstündü. Lakin məhz belə turnirlərdə mübarizə yerli oyunçulara böyük təcrübə qazandırır. Bu isə növbəti illərdə bəhrəsini verəcək. Üstəlik kapitanımız Endər Poladxanlı ilə ən çox xal toplayan basketbolçumuz Deandrenin zədə səbəbindən son oyunlarda iştirak etməməsi komandanın çıxışına mənfi təsir göstərdi. Bir qədər bəxtsizlik oldu. İstənilən halda, biz artıq bu səviyyədə oyunlara öyrəşməliyik. Qrupda yer alan rəqiblər yüz il tarixi, ənənəsi olan komandalardı. Rəqiblərimizlə müqayisədə biz cəmi iki ildi bu səviyyədə oyunlara çıxırıq və keçirdiyimiz bütün oyunlarda da komandamız meydanda son saniyəyə kimi mübarizə aparıb. Bunu hesablara baxarkən də görmək olar. Komandamız növbəti 3 oyunda da parketə qələbə üçün çıxacaq. Baş məşqçimiz Kurtinaytisə gəlincə, o, Avropa basketbolunun əfsanəsidi. Böyük təcrübəyə malikdi. Təsadüfi deyil ki, Litva millisi yenidən onun təcrübəsinə ehtiyac duydu. Ona yığmanın baş məşqçisi kimi noyabrda keçiriləcək oyunlarda uğurlar arzulayırıq. Baş məşqçimizə güvənirik”.
RÖYANƏ OĞUZ
