Oktyabrın 13-15-i aralığında futbol üzrə Avropa çempionatının seçmə mərhələsinin 7-8-ci turları çərçivəsində 22 oyun keçirildi.

"Football-plus.az" xəbər verir ki, oktyabrın 13-də Fransa, Portuqaliya və Belçika, srağagün isə İspaniya, Şotlandiya və Türkiyə AÇ-yə vəsiqə qazandı. Xankəndidə bayrağımızın ucaldığı gün “ay-ulduzlular”ın ardıcıl 3-cü qitə birinciliyində oynamaq haqqı qazanması bir başqa ləzzət idi. Daha bir dost ölkə - Qazaxıstan isə səfərdə Danimarkaya uduzmaqla bu mənada şansını xeyli azaltdı.

İspaniya səfərdə Norveç üzərində strateji cəhətdən vacib qələbə qazandı. Skandinavların bu qrupda İspaniya ilə Şotlandiyanın “başını ağrıtmaq” imkanı var idi, ancaq onlar son məğlubiyyətlə bu iki komandanın AÇ-yə yolunu açdı. İlk yarıda meydanda amansız, amma qol vəziyyətləri ilə zəngin olmayan mübarizə getdi. 20-ci dəqiqədə meydanda çox maraqlı epizod yaşandı. Strannberqdən səkən top onsuz da tora daxil olurdu. Ancaq qapı xəttində dayanan Moratanın acgözlüyü qolun qeydə alınmamasını şərtləndirdi. Belə ki, Karvaxalın həmin səkməyə səbəb olan ötürməsi zamanı Morata artıq ofsaydda idi. 2-ci hissədə təzyiqi artıran ispanlar tezliklə qol istəyinə çatdı. Holann və komanda yoldaşları ən azı Qavi hesabı açandan sonra fəallaşmalıydı. Ancaq yığmanın liderləri heç nə ilə yadda qalmadı, azarkeşləri məyus etdi. Bir sözlə, Norveçin AÇ-dən kənarda qalması tam qanunauyğundu.

Qrupun digər oyununda Gürcüstan Cənubi Kipri darmadağın etdi. İlk yarı meydan sahiblərinin üstünlüyü şəraitində keçsə də, hesab açılmadı. Villi Sanyol fasilədə yetirmələrinə yaxşıca “qulaqburması vermişdi”. 2-ci hissə başlayan kimi Kiteişvili fərqləndi. Saatın tamamında isə Kvaratsxeliya haqq etdiyi qolu vurdu. Seçmə mərhələdə cəmi iki qol vuran Kipr yunanların bu fərqi aradan qaldıracağı çətin görünürdü. Belə də oldu. Sonradan meydana çıxan Şengeliya tezliklə fərqi darmadağın həddinə çatdırdı. Nəhayət, 5-ci uzatma dəqiqəsində Mikautadze penaltidən fərqləndi. Gürcüstan bu qrupdan çıxmaq şansını itirsə də, Millətlər Liqası vasitəsi ilə AÇ-yə yollana bilər. Bir neçə gün əvvəl Taylandı da 8:0 məğlub edən qonşularımızın iki oyunda 12 qol vurması da maraqlı məqamdı.

A qrupu, 8-ci tur
Norveç – İspaniya 0:1 (0:0)
Norveç: Nülann, Ryuerson, Strannberq (Ayer, 77), Estiqor, Melinq, Eursnes (Torstvedt, 77), Berq (Nusa, 58), Edeqor, Berge, Bobb (Sörlot, 58), Holann.
İspaniya: Simon, Karvaxal, Le Norman (D.Qarsiya, 46), Lyaport, F.Qarsiya, Ruis, Rodri, Qavi (Sanset, 79), Torres (Pedrasa, 71), Fati (Oyarsabal, 46), Morata (Xoselu, 89).
Qol: Qavi, 49.
Vərəqələr: Le Norman, 30. Bobb, 31. Ryuerson, 40. Lyaport, 56. Morata, 61. Rodri, 86 – sarı.
Hakim: Tobias Ştiler (Almaniya).
15 oktyabr. Oslo. 25885 tamaşaçı.
Gürcüstan – C.Kipr 4:0 (0:0)
Gürcüstan: Mamardaşvili, Kaşiya, Kverkveliya, Loçoşvili, Azarov (Şengeliya, 71), Kiteişvili (Kvekveskiri, 85), Koçoraşvili, Çakvetadze (Davitaşvili, 71), Mamuçaşvili, Kvaratsxeliya (Mekvabişvili, 85), Zivzivadze (Mikautadze, 59).
C.Kipr: Mall, Andreu (Antoniu, 46), Qoqiç, Karo, Kiprianu, İoannu (A.Korreyya, 87), Kiriaku (Haralampus, 62), Kusulos, Spolyariç, Kastanos (Loizu, 70), Xristofi (Kakulis, 70).
Qollar: Kiteişvili, 46 (1:0). Kvaratsxeliya, 58 (2:0). Şengeliya, 82 (3:0). Mikautadze, 90+5 (4:0).
Vərəqələr: Xristofi, 29. Çakvetadze, 45. Karo, 48 – sarı.
Hakim: Robert Cons (İngiltərə).
15 oktyabr. Tbilisi. 27223 tamaşaçı.
1. İspaniya 6 5 0 1 19-3 15
2. Şotlandiya 6 5 0 1 12-3 15
3. Norveç 7 3 1 3 11-9 10
4. Gürcüstan 6 2 1 3 9-13 7
5. C.Kipr 7 0 0 7 2-25 0

Fakt
İspaniya yığması son 4 oyunda ümumi 16:1 hesabıyla qələbə qazanıb. “Qırmızı qəzəb” Norveçə qədər Gürcüstan (7:1), Cənubi Kipr (6:0) və Şotlandiya (2:0) ilə oyunlardan da qalib ayrılmışdı.

Oyundan sonra
Luis de la Fuente, İspaniya yığmasının baş məşqçisi: “Komanda böyüyür. Biz vahid kollektivik və bu meydanda da görünür. Bu uğura nail olmaq üçün xeyli iş görmüşük. AÇ-yə vəsiqə öhdəlik və məsuliyyətdi, başqa heç nə. Bu seçmə mərhələdə nələrdən keçdiyimizi xatırlayırıq. Problemlər həll olundu, detallar düzəlişə məruz qaldı, ancaq ssenari həminkidi”.