“Futbolçular istirahət günlərində istədiyini edə bilərlər”
Killian Mbappenin milli komandaya münasibəti ilə bağlı maraqlı iddia yayılıb.
“Real”ın ulduz futbolçusunun Fransa yığmasının hər oyununda iştirak etmək istəmədiyi söylənilir.
Bunu Fransa mənbələri iddia edir. 25 yaşlı hücumçunun bundan sonra milli komandanın yalnız vacib oyunlarında iştirak etmək istədiyi bildirilir. Buna səbəb zədə almaq riskini azaltmaqdı. İddialara görə, Kilian 2025-ci ildə “Qızıl top” mükafatını almaq istədiyinə görə klubunun oyunlarına üstünlük verməyi lazım bilir. O, yığmanın məşqçilər heyətinə oktyabr toplanışına gəlməyəcəyini əvvəlcədən bildirib.
Bu mövsüm “Real”ın heyətində 11 oyuna çıxıb 7 qol vuran və 1 məhsuldar ötürmə edən futbolçunun Fransa yığmasına münasibətinin dəyişdiyini bu fakt da sübut edir. Belə ki, Kilian milli komanda Millətlər Liqasında İsrail ilə qarşılaşdığı vaxtda – oktyabrın 10-da İsveçin Stokholm şəhərində gecə klubunda əylənirmiş. Maraqlıdı ki, “üçrənglilər”in baş məşqçisi Didye Deşam onun yığmaya kömək etmək yerinə istirahətə üstünlük verməsinə sakit münasibət bildirib:
“Yığmanın iştirak ərizəsində adı olmayan oyunçularla bağlı xəbərləri izləmirəm. Kilian hazırda klubunun planına əsasən “Real”ın sərəncamındadı. Mən onun milli komandanın oynadığı gündə istirahətdə, gecə klubunda olub-olmadığını bilmirəm. Baş məşqçi kimi dəvət göndərdiyim oyunçularla işləməliyəm”.
Deşam Mbappenin İsraillə matçdan əvvəl ona mesaj yazdığını da əlavə edib:
“O, əvvəl-axır öz klubunun oyunçusu kimi müəyyən proqrama riayət etməyə borcludu. Futbolçular istirahət günlərində istədiyini edə bilərlər”.
Digər xəbərlər
