Nadal gələn ay karyerasını bitirməyə qərar verdi - “Daha oynaya biləcəyimi düşünmürəm”
“Böyük dəbilqə” turnirlərinin 22 qat qalibi, tennis üzrə olimpiya çempionu Rafael Nadal bu ilin noyabrında karyerasını bitirəcəyini elan edib.
38 yaşlı ispaniyalı ulduzun son turniri Devis kuboku olacaq. Nadal sosial şəbəkə hesabında bunları yazıb: “Hər kəsə salam! Peşəkar tennisdən gedişimi xəbər vermək istəyirəm. Reallıq belədi. Çətin dönəmlərim olub, xüsusən son iki ildə. Daha oynaya biləcəyimi düşünmürəm. Bunun çətin qərar olduğu aydındı, ancaq bu həyatda hər şeyin əvvəli və sonu var. Mənə elə gəlir ki, indi karyeramı bitirmək üçün ən yaxşı vaxtdı. Uzun və uğurlu olan karyeramı”.
İspaniyalı Nadal tarixin ən uğurlu tennisçilərindən biridi. O, “Rolan Qarros”da qələbə sayına (14 titul) görə rekordçudu.
Reaksiyalar
İspaniya Təhsil, Peşəkar Hazırlıq və İdman Nazirliyi:
“Əfsanə. Mif. İspaniya və dünya idmanının tarixi. Sağ ol, Rafa”.
Rocer Federer:
“Necə gözəl karyera, Rafa! Həmişə inanırdım ki, bu gün heç vaxt yetişməyəcək. Unudulmaz xatirələrə və sevimli oyundakı bütün qeyri-adi uğurlarına görə sağ ol. Mənim üçün mütləq xoşbəxtlik idi”.
Kriştiano Ronaldo:
“Rafa, bu qeyri-adi karyera idi. Sənin işə bağlılığın, ehtirasın və qeyri-adi istedadın bütün dünyada olan milyonlarla adamı ruhlandırırdı. Sənin karyeranı görmək, səni özümə dost saymaq mənim üçün böyük şərəf idi. İstirahətdən ləzzət al”.
Novak Cokoviç:
“Sənə və bu idman növü üçün etdiklərinə hörmətimi çatdırmaq üçün bir paylaşım bəs deyil. Sən milyonlarla uşağı tennislə məşğul olmağa həvəsləndirmisən. Düşünürəm ki, belə uğuru yalnız arzulamaq olar. Sənin inadkarlığın, məqsədyönlülüyün, döyüş ruhun onilliklər ərzində nümunə kimi göstəriləcək. Sənin irsin əbədi yaşayacaq. Tennisin və idmanın bütü olmaq üçün nələrdən keçdiyini yalnız sən bilirsən. Bizim rəqabətdə dəfələrlə məni imkanlarımın son həddində oynamağa məcbur etdiyinə görə sağ ol. Bu sınaqlar mənə tennisçi kimi böyük təsir göstərib. Malaqada keçiriləcək Devis kubokunda milli komanda ilə ən yaxşı şəkildə vidalaşmağını arzulayıram. Sənin ulduz karyerana hörmətimi göstərmək üçün özüm də orda olacam”.
Tomas Bax:
“Əziz Rafa, sən əfsanəsən! Əsl olimpiyaçı və həmişə idmanın bu dünyanı yaxşılaşdırmasına yardım edə biləcəyini dərk edən böyük çempionsan. Əminəm ki, nə işlə məşğul olursan-ol, həmişə səndən asılı olan hər şeyi edəcəksən. Şlyapamı çıxarıram, təbrik edirəm”.
Digər xəbərlər
