Yəqin ki, tezliklə saytların birində U-21 millimizin baş məşqçisi Samir Əliyevin növbəti nağıllarıyla tanış olacağıq. AÇ-2025-in seçmə mərhələsində İngiltərəyə biabırçı hesabla uduzan (0:7!) komandanın çalışdırıcısı eşitməkdən, oxumaqdan bezdiyimiz cümlələri yenidən təkrarlayacaq...

Əlbəttə, bu, baş verməyə də bilər. O halda ki, abrına sığınıb matçın nəticəsini sosial şəbəkə hesablarında paylaşmayan, rəsmi saytında “U-21 seçmə mərhələdə çıxışını başa vurub” sərlövhəli yayındırıcı başlıqdan istifadə edən AFFA kimi, Samir bəy də rüsvayçılığı ört-basdır etmək üçün susar. Və ya çantasını yığıb yola düzələr. İndiki halda, inandırıcıdı görünməsə də...

Əliyevin danışmamasının başqa səbəbi də ola bilər. Bəlkə də o, dünən gecə saatlarından millimizin məğlubiyyətinə haqq qazandırmaq üçün nəsə bəhanə axtarır. Amma tapa bilmir ki, bilmir. Sizi qınamıram, Samir bəy. U-21 yığmasında “milliləşdirilmiş” futbolçu yoxdu ki, “vətən, torpaq, bayraq sevgisi” deyib ikiəlli boğazından yapışaq. AFFA-nı top atəşinə tutaq ki, himnimizi bilməyənləri rədd edin. Futbolçular da yerlidi, kapitan sarğısını daşıyan da, elə baş məşqçi özü də. Lənətə gələsən, kor şeytan! Pullar niyə əcnəbi mütəxəssisin cibinə axmır?!

Hələ tərsliyə bax. Heyətdə legioner həyatı yaşayan Cəlal Hüseynov var. Bolqarıstanda oynayan həmyerlimiz qapıya zərbə endirməyin, hətta qol vurmağın sirlərindən agah olsa da, qapıların yerini öyrənə bilməyib. “Əşi, əziz qardaş, hələ gəncsən, 21 yaş nədiki? Öyrənəcəksən” deməyə də dil tərpənmir. Axı ingiltərəlilərin də elə 21 yaşı var! Uzağa niyə gedirik?! 27 yaşda Almaniyadan Bakıya “qırmızı” dalınca gələnin ardıcılı Bakıdan İngiltərəyə avtoqol dalınca getməlidi də!

Samir Əliyevin isə 45 yaşı var. O, 2022-ci ilin iyulundan U-21 millimizin baş məşqçisidi. İndiyə qədər yığmamızı 17 oyunda meydana çıxaran mütəxəssis cəmi iki dəfə qələbə qazanıb – yoldaşlıq oyununda Sloveniyaya (2:0), AÇ-2025-in seçmə mərhələsində Lüksemburqa (3:2) qalib gəlmişik. İki oyunda heç-heçə, 13-də isə məğlubiyyət qeydə alınıb. Top nisbəti də fiaskodu – 12:46!

AÇ-2025 üçün ümidlərimiz “dəfn edildi”. Futbolun vətənində keçirilən formal oyun reallığı bir daha göz önünə sərdi. 10 oyunda 3 xal toplayan millimiz üçün hər şey bitdisə, Samir Əliyev üçün də bitməlidi. Bəli, Samir bəy, yola düzülmək vaxtıdı. Amma bir xahişimiz var: “daha dərin problemlər var, bu gün danışmaq istəmirəm” deyə-deyə hər dəfə nəyəsə işarə vurduz. Bəlkə qapını möhkəm bağlayasız! Və lütfən, qapını bağlayanda o dərin problemin nədən ibarət olduğunu da deyin!

KƏNAN BAHADIR