21 yaşadək futbolçulardan ibarət yığmamız srağagün AÇ-2025-in seçmə mərhələsində Ukraynaya məğlub oldu – 0:1.

Qarşılaşmada yaşananları reportajdan diqqətinizə çatdırmışıq. Matçın ən maraqlı hadisəsi 63-cü dəqiqəyə təsadüf etdi. Samir Əliyev yarımmüdafiəçi Samir Abdullayevi Murad Vəliyevlə əvəzlədi. “Səbail”in gənc üzvü isə bu qərara etiraz etdi. Meydandan çıxan vinger əvvəlcə qoluna bağladığı sarğını açaraq yerə çırpdı. Daha sonra isə baş məşqçinin uzatdığı əli sıxmadı. Hətta təcrübəli mütəxəssis ona təsəlli vermək istəyəndə çalışdırıcını itələdi. Bir sözlə, Samir adaşına və məşqçisinə qarşı tərbiyyəsizlik etdi.
Yəqin ki, “Səbail”in üzvü baş məşqçisinin kim olduğunu bilmir. Ya da Samir Əliyevin karyerasından bixəbərdi. Ola bilər ki, mütəxəssis baş məşqçi kimi o qədər də uğurlu nəticələr əldə etməyib. Amma futbolçu kimi möhtəşəm karyeraya sahibdi. Forvard Azərbaycanda “Neftçi”, “Xəzər Lənkəran” “İnter” kimi klubların əsas üzvü olub. Ölkə xaricində Rusiya “Urallan”ında və Ukrayna “Volin”ində çıxış edib. 31 matçda milli forma geyinib. Bir sözlə, Samir Əliyev Azərbaycan futbolu üçün can qoyub. İndi də U21 yığmamıza yaxşı-pis rəhbərlik edir? Bəs onun adaşı olan gənc Samir nə ilə yadda qalıb? “Səbail”də ehtiyatdan meydana çıxmaqdan başqa nə iş görüb? Abdullayev hansı haqla Əliyevə qarşı tərbiyəsizlik edir? Bu cəsarəti hardan alır? Əmisi oğlu Araz Abdullayevdən? Belə şeyi yığmanın sabiq üzvü etsəydi, yenə dərd yarı olardı. Araz 17 yaşında “Everton”a transfer olundu. “Neftçi”, “Qarabağ”, “Qəbələ” kimi klublarda çıxış etdi. Yarımmüdafiəçi həmişə ölkənin ən yaxşı futbolçularından hesab olundu. Düzdü, Arazın da xasiyyətində müəyyən problemlər var idi. Özündən razı idi. Amma buna uyğun da futbol sərgiləyirdi. Lakin mən heç vaxt görməmişəm ki, Araz hansısa məşqçiyə münasibətdə Samir kimi davransın.

Baş məşqçi açıqlama verib ki, futbolçu etdiyi hərəkətdən peşman olub. Buna baxmayaraq, cəzalanacaq. Abdullayev canını bununla qurtarmamalıdı. Hətta klubdakı çalışdırıcısı Şahin Diniyev də futbolçunu cəzalandırmalıdı. Uzun müddətə əvəzedici komandaya göndərməlidi. Samir Əliyev, ümumiyyətlə, adaşının üzərindən xətt çəkməlidi. Onu bir daha milliyə dəvət etməməlidi. Abdullayev o qədər də istedadlı futbolçu deyil ki, onu yığmaya çağırmamaqla nəsə itirək. Ola bilər ki, onun mövqeyində hansısa axsama olacaq. Amma bu da böyük problem deyil. Təki millinin heyətində böyüyə-kiçiyə hörmət edən futbolçular çıxış etsin. Məşqçisinə, özü də Azərbaycan futbolunun əfsanələrindən birinə qarşı tərbiyəsizlik edən şəxs milli formaya necə dəyər verə bilər?

İLKİN SULTANLI