Pinti adamlar axı həm də tənbəl olur. Bütün əşyaları bir rəfə sıxışdırıb zar-zor qapısını bağlayırlar. Başqa biri qapını açanda məlum mənzərə yaşanır: hamısı yayılır bir yana, tör-töküntü ürək bulandırır. Çox vaxt günah həmin tənbəldə yox, qapını açanda olur.

U-21-in baş məşqçisi Samir Əliyevin durumu məhz həmin "günahkar"ı xatırladır. Futbol təsərrüfatımızda yetişməkdə olan gənc nəsil yoxdu. Daha doğrusu, həmin oyunçuların sayı o qədər azdı ki, nəinki nəsil, 11 nəfər optimal start heyətini araya-ərsəyə gətirmək müşkülə çevrilib. Əliyev "qapını açanda” klublarının ehtiyat oyunçular skamyasını zəbt edən, beynəlxalq turnirlərdə fiasco ilə yadda qalan komanda və scı məğlubiyyətlər üstünə tökülür. Belədə milli komandalardakı problemlərin kökünü təhlil edə bilənlərin ilk tənqid hədəfi AFFA-nın yöndəmsiz fəaliyyəti olursa, kollektivi meydana çıxaran mütəxəssis də qınanılır.

Yox, vacib oyun ərəfəsində özümü Samir bəyə sipər etmək fikrində deyiləm. Hər halda, o, birmənalı şəkildə günahsız deyil. Avropa çempionatının seçmə mərhələsi çərçivəsində keçirilən ilk 7 oyunda əlindən gələni etsə də, yetərincə səhvə yol verib. İstər xeyli oyun planı, istərsə də strateji, taktiki gedişləri bəhrə verməyib. Məncə, mütəxəssisin əsas səhvi taleyin acı reallığıyla barışmamasıdı. 7 oyunun altısında məğlub olan, təbii ki, turnir cədvəlinin sonuncu pilləsində qərarlaşan komandanın çalışdırıcısı həm millimizin, həm də özünün gələcəyi naminə radikal davranış sərgiləməyə məcburdu.

21 yaşlılarımız serb həmyaşıdlarının öhdəsindən gələ bilərmi? Bəli, lakin möcüzə sayəsində. Tutaq ki, 3 xal qazandıq. Belədə turnir cədvəlində yerimizdə sayacağıq. Axı İrlandiya bizdən 4 xal öndədi!
Mənə elə gəlir ki, AFFA-nın başı əsas milliyə qarışdığından ya U-21-in varlığını unudub, ya da Samir Əliyev baş məşqçi postunda gün sayır və özü də bundan xəbərdardı. Belə deyil? Vallah, belə biabırçılığın başqa məntiqli izahı yoxdu!

KƏNAN BAHADIR