“Barselona” oktyabrın 2-də 34 yaşlı qolkiper Voytsex Şensnının keçidini elan edib.

Aydın məsələdi ki, polşalı ciddi zədə alan Mark-Andre ter Ştegenin əvəzinə gətirilib. La Liqanın qaydaları azad agent kimi müqavilə bağlayan futbolçuları sifariş ərizəsinə salmağa imkan vrir. Kataloniya klubunun rəhbərliyi də məhz bu qaydadan yararlanıb.

Qapıçının “Barsa” ilə müqaviləsi 2025-ci ilin iyununa qədər nəzərdə tutulub. “Diario Sport”un yazdığına görə, “göy-qırmızılar” ona bir il üçün 3 milyon avroya yaxın (vergilər çıxılmadan) və bonuslar ödəyəcək.

Maraqlıdı ki, Voytsex “blauqrana”nın şərəfini qorumaq naminə karyerasını bitirməklə bağlı qərarını dəyişdi – o, avqustun 27-də “peşəkar futboldan getmək qərarına gəldim”, - deyə “Yuventus”la müqaviləni vaxtından əvvəl pozmuşdu, indi isə top-klubla müqavilə bağladığına görə Turin klubuna 2 milyon avro kompensasiya ödəməli olacaq.

Voytsexlə danışıqlar çoxdan gedirdi. Ancaq klub “qeydiyyatla bağlı texniki problemlər” üzündən keçidi elan edə bilmirdi. Çərşənbə axşamı, oktyabrın 1-də - “Barselona”nın Çempionlar Liqası çərçivəsində “Yanq Boyz”u darmadağın etdiyi (5:0) oyunu izləyənlər arasında polşalı qapıçı da var idi.

Xatırladaq ki, “Barsa” əsas qapıçısı Ter Ştegeni uzun müddətə itirib. 32 yaşlı alman sağ dizinin vətərlərini qırıb və buna görə ən azı 8 ay yaşıl meydana çıxa bilməyəcək. Odu ki, təcili ona güclü əvəzedici tapılmalıydı. Düzdü, heyətdə 25 yaşlı İnyaki Penya da var. “La Masiya”nın yetirməsi Mark-Andre zədələnəndən sonra artıq 4 oyunda “Barselona” forması geyməyə imkan tapıb. Ancaq oyunu ilə klub rəhbərliyinə inam bəxş etməyib. Düzünə qalsa, ötən mövsüm də özünü almaniyalı kiperin layiqli əvəzedicisi kimi göstərə bilməyib.
“Göy-qırmızılar” yalnız azad agentlərin namizədliyini nəzərdən keçirə bilərdi. Ona görə ki, Avropada “transfer pəncərəsi” yanvara qədər bağlıdı. Voytsex yeganə variant deyildi. Loris Karius, Klaudio Bravo və Keylor Navasın da namizədliyi müzakirə olunurdu. İspaniya mediasına inansaq, polşalının keçidində həlledici rolu həmvətəni Robert Levandovski oynayıb. Məhz məşhur hücumçu Şensnının Kataloniyanın paytaxtına köçməsində israrlı olub.

Xatırladaq ki, qolkiper Polşa yığması üçün uğursuzluqla nəticələnən Avropa çempionatından sonra mydana çıxmayıb. Almaniyadakı turnir yığma üçün qrup mərhələsində bitib, Voytsex isə iki oyunda meydana çıxaraq 5 qol buraxıb. O, son 7 mövsümü “Yuventus”da keçirib. Turin klubuna qədər də “Roma”, “Arsenal” və “Brentford”un şərəfini qoruyub. Avqustun sonunda isə gözlənilmədən karyerasını bitirdiyini elan edib. Qolkiper həmin vaxt sosial şəbəkədə belə yazmışdı:

Şensnı artıq böyük futbola qayıdır, ancaq forma yığmalı olacaq. Çox güman, bunun üçün müəyyən vaxt lazım gələcək. Polşalı qapıçını yalnız yığmaların oyunları üçün yaranan fasilədən sonra yaşıl meydanda görə biləcəyik.