Türkiyə çempionatının 1-ci liqasında forma geyən azərbaycanlı futbolçulardan biri də Vüsal İsgəndərlidi.

Albaniya karyerası ürəkaçan olmayan Vüsalın indiki komandası “Boluspor”da da çətin günlər yaşanır. Mövsümə uğursuz nəticələrlə başlayan, məşqçi dəyişikliyi edilən komanda hazırda autsayderlər sırasındadı. Hətta Vüsalın Albaniyaya dönmək variantı da ortaya atılıb. Belə zəif nəticələr fonunda İsgəndərlinin yığmaya çağrılmaması təəccüb doğurmadı. Dünən onunla əlaqə saxladıq, bəzi suallara cavab tapmağa çalışdıq.

- “Boluspor” ilk 5 turda cəmi bir qələbə qazanıb və turnir cədvəlində 5 xalla autsayderlər sırasındadı. Ötən mövsüm Superliqaya yüksəlmək üçün mübarizə apardığınız halda, yeni mövsümə belə pis başlamağın səbəbi nədi? Bundan sonra hədəf nə olacaq?
- Hələ çempionat yenicə başlayıb. Düzdü, 5 oyun keçib və istədiyimiz nəticələr yoxdu. Çətinlik çəkirik, heyət eyni olsa da, baş məçqçimiz yenidi, onun istədiyi şeylər başqadı və s. Amma çempionat uzun marafondu, hər şey ola bilər. Tezliklə toparlanmalıyıq. Əlimizdən gələni edib, daha yaxşı nəticələr qazanmağa çalışmalıyıq.

- Ötən oyunda adın iştirak ərizisinə salınmamışdı. Bu, fiziki durumunda hansısa problem ilə bağlıdı, yoxsa heyətdəki rəqabətlə?
- Xəstəydim. Əslində komanda ilə getmişdim, amma alınmadı. Yəni özümü yaxşı hiss etmirdim deyə iştirak ərizəsinə adım salınmamışdı. İnşallah, növbəti matçlarda heyətdə olaram. Yəqin ki baş məşqçi mənə şans verər. Şans verildiyi təqdirdə əlimdən gələn hər şeyi etməyə hazıram.

- Ardıcıl uğursuz nəticələr Türkiyədəki karyerana necə təsir edə bilər? Bu yay Türkiyədən və Azərbaycandan hansısa təkliflər aldınmı?
- Əslində təsir edəcəyini düşünmürəm. Hələ ki karyeramı ölkə xaricində davam etdirmək istəyirəm, Azərbaycana qayıtmaq fikrim yoxdu. Ümid edirəm xeyirlisi olar. Zaman göstərər. Böyük danışmaq istəmiəm. Amma ağlımdakı xaricdə oynamaq, legioner həyatını davam etdirməkdi.

- Amil Yunanov bu həftə Albaniyanın “Bülis” klubuna transfer olundu. Albaniyada çıxış etmiş biri kimi onunla danışdınmı, məsləhətlərini, klub barədə fikirlərini bölüşdünmü?
- Hə, Amillə dünən danışdım, xeyir-dua verdim. Çox sevindim. Əslində o çempionatı bu dərəcədə bilməzdim. Həqiqətən də həm döyüşkən, həm də sərtliyi sevən çempionatdı. Bir də özünü yaxşı tərəfdən göstərdiyin halda, yaxşı yerdən təkliflər gələ bilər. Yüksək yerlərə getmək imkanın və şansın olduqca böyükdü. İnşallah, Amil də orda uğurlu olar.

- Ümumiyyətlə, “Bülis”i necə tanıyırsan, bu barədə nə deyə bilərsən? Albaniya çempionatının bizimki ilə müqayisədə hansısa üstünlükləri varmı?
- Dediyim kimi, yaxşı seçim edib. Çempioanları müqayisə etməyi sevmirəm. Nə Albaniya, nə Türkiyə, nə də Azərbaycanı biri-biri ilə müqayisə etməyi xoşlayıram. Mənə elə gəlir ki, hər birinin özünə görə həm güclü, həm də zəif cəhətləri var.

- Yığmamız Millətlər Liqasında iki oyun keçirdi və ikisində də məğlub oldu. Həmin oyunlarını izlədinmi? Komandamızın məğlubiyyətlərinin səbəbini nədə görürsən?
- Millinin hər iki oyununu izlədim. Fikrimcə, İsveçə qarşı ilk 45 dəqiqədə doğrudan da yaxşı oynadıq. Penalti epizodu qol olsaydı, fərqli şeylər ola bilərdi. Amma futboldu, bəzən penaltni qaçıra bilirsən. Əlbəttə, Ramil Şeydayev də çox istəyərdi qol olsun. Amma olmadı. Slovakiya ilə heç istədiyimiz oyun alınmadı. Milimizə yeni baş məşqçi gəlib, fərqli nəsə etmək istəyir. Onun öz oyun üslubu, seçimləri, taktikası var. Bunun üçün zaman lazımdı. Əvvəl-əvvəl həm futbolçular, həm də baş məşqçilər üçün çətin olur. Mənə elə gəlr ki, iki oyunun nəticəsinə görə nəsə demək düzgün olmaz.

- Yığmanın yeni baş məşqçisi Fernando Santuş səni ilk toplanışa çağırmadı. Səbəb nədi? Özünü hazır hiss edirdin? Buna görə incimədin ki? AFFA-dan sənə zəng edən, işlərinlə maraqlanan olurmu?
- Düzü, çağrılmamağımın səbəbini bilmirəm. Amma əlbəttə, bir problem yoxdu. Burdakı üç oyunda iştirak etmişdim Sadəcə, birində əsas heyətdə oldum, ikisində sonradan meydana çıxdım. Ola bilər, baş məşqçimizin seçimi elədi. Mən də onun seçiminə hörmətlə yanaşıram. Əlimdən gələni edib, növbəti oyunlara dəvət almağa çalışacam. Millimizin şərəfini qorumaq hər kəs üçün qürürdu. Mən də buna layiq olmaq üçün bacardığımı edəcəm.

- Santuşun gələcək planlarında Vüsal İsgəndərli yoxdu, yoxsa indiki vəziyyətində çağrılmamağın ədalətli qərar idi?
- Əlbəttə, baş məşqçi də istər ki, əlinin altında yaxşı, tam hazır oyunçular olsun. Ola bilər bizim oyunları izləyib. Az oynadığıma görə Fernando Santuşa haqq verirəm. Heç bir problem yoxdu. Mən də gələn oyunlara dəvət almağa çalışacam.

RÖYANƏ OĞUZ