Yığmanın oyunları ilə bağlı yaranmış fasilədən istifadə edən “Qalatasaray” yoxlama oyunu keçirib.

Türkiyə çempionu öz bazasında 1-ci liqa təmsilçisi “Erokspor” ilə qarşılaşıb. 11 qolun vurulduğu görüşdə “Cim-Bom” rəqibini 8:3 hesabı ilə məğlub edib. Sara, Yusuf Dəmir, Torreyra, Mertens və Xəlil Dərvişoğlu hərəyə bir dəfə fərqlənibsə, Batşuayi het-trik edib.

İstanbul nəhəngi şənbə günü superliqanın 5-ci turu çərçivəsində öz meydanında “Çaykur Rizəspor” ilə qarşılaşacaq.

Qeyd edək ki, 1959-cu ildə qurulan “Erokspor” bu il tarixində ilk dəfə 1-ci liqada çıxış edir. Bu komanda vaxtilə burda Rəcəp Tayyip Ərdoğanın forma geyməsi ilə məşhurdu. İstanbul təmsilçisi bu mövsüm 1-ci liqada keçirdiyi hər üç oyundan məğlubiyyətlə ayrılıb.

“Qalatasaray”la bağlı başqa xəbərlər də var. “Adana Dəmirspor”a qarşı son oyunda zədələnərək ilk yarıda əvəzlənən Mauro İkardinin nə qədər müddətə sıradan çıxdığı məlum olub. Təcrübəli argentinalı hazırda vətənindədi. O, Argentinada artıq ayrıldığı Vanda Nara və uşaqları ilə bir araya gələrək onlarla vaxt keçirib.

Bundan başqa İkardi müalicəsini bir müddət vətənində davam etdirəcək. 31 yaşlı futbolçunun ən azı 1 ay topa toxuna bilməyəcəyi və sentyabrın 21-dəki “Fənərbaxça” ilə prinsipial derbini buraxacağı dəqiqdi.

Amma bəzi mənbələrin iddiasına görə, İkardinin zədəsi gözləniləndən də ciddidi. Onun trəxminən 2 aylığa sıradan çıxdığını iddia edən mənbələr də var. Derbidə “Aslan”ın əsas qol ümidi Batşuayi ilə yeni transfer Viktor Osimhen olacaq.

Bu arada İkardinin özünə yeni malikanə almaq istədiyi məlum olub. Vanda Naradan ayrıldığına görə o artıq əvvəlki evdə yaşamaq istəmir. Ünlü forvard Argentinaya yola düşməmişdən öncə İstanbul boğazına yaxın ərazidə satışda olan malikanələrə baxıbmış.

Xatırladaq ki, illik qazancı 6 milyon avroya bərabər olan İkardi avqustun sonlarında özünə 52 milyon lirə (təxminən 1,4 milyon avro) dəyərində “Lamborcini Urus” markalı maşın almaqla diqqət mərkəzinə düşmüşdü.

“Qalatasaray”ın daha bir üzvü də zədələnib. Söhbət yeni transfer - seneqallı İsmail Yakobsdan gedir. 25 yaşlı sol müdafiəçi dünən Afrika Millətlər Kubokunun seçmə mərhələsi çərçivəsində Seneqalın səfərdə Burundini 1:0 yendiyi qarşılaşmada zədə alıb. Start heyətində meydana çıxan futbolçu 90-cı dəqiqədə oyuna davam edə bilməyəcəyinə işarə vuraraq əzələnməsini istəyib. Onun zədəsinin ciddiliyi barədə hələ ki məlumat yoxdu.

“Qalatasaray” bir müddət öncə Yakobsu 1 milyon avro qarşılığında “Monako”dan birilliyə icarəyə götürmüşdü. Futbolçunun illik maaşı 2,1 milyon avro təşkil edəcək.