Misli premyer-liqasında 4-cü tur da geridə qaldı. Özü də sensasiyalarla zəngin oldu.

Fikri “Dinamo”nun yanında olan “Qarabağ”ın evdə “Turan Tovuz”a, həmçinin çempionluğa namizədlərdən sayılan “Zirə”nin də elitaya yeni yüksələn “Şamaxı”ya uduzması hər kəsi təəccübləndirdi. Hələ ki yanılmadığımız və gözləntilərimizi doğrulayan “Kəpəz”di.
Açılış matçında “Səbail”in sərgilədiyi oyun Şahin Diniyevin “bu komandaya maksimum 3 tur lazımdı” sözlərini təsdiqlədi. Əlbəttə, “Kəpəz” bu qarşılaşmanın aşkar autsayderi idi. Buna baxmayaraq, “dənizçilər”in meydanda sərgilədiyi kombinasiyalı oyunu da gözardı etmək olmaz. Yəni ilk turlarda autsayderlər sırasında adı hallanan “Səbail” bundan sonra daha yaxşı nəticə göstərmək potensialı olduğunu hiss etdirdi. “Kəpəz” üçün isə hələlik ümidverici heç nə görünmür. İndi gəncəlilərin hesabında nə qol var, nə də xal!

“Qarabağ” – “Turan Tovuz” matçı daha çox Qurban Qurbanovla Kurban Berdıyev dueli kimi diqqəti çəkirdi. İlk dueldən qalib ayrılan Berdıyev (yeri gəlmişkən, türkmən mütəxəssis srağagün 72 yaşını tamamladı) bu mövsüm çempionluq yolunda “Qarabağ” əngəl törədə biləcəyini göstərdi. Tovuzluların geridə qalan 4 tur ərzində hələ də qapısında qol görməməsi yaxşı nəticədi. Bu tilsimi kimin qıracağı isə maraqla gözlənilir. Çünki Berdıyev özünəməxsus müdafiə redutları qurur. Əlbəttə, “Qarabağ”ın üzərində Zaqreb “Dinamo”su ilə ağır oyunun yorğunluğu da var idi. Ancaq ağdamlıların qonaqların qapısına 90 dəqiqə ərzində cəmi iki dəfə dəqiq zərbə endirə bilməsi Berdıyevin yetirmələrinin müdafiədə heç bir boşluğa yol vermədiyi gerçəyini dəyişmir. Təbii ki, məğlubiyyətə baxmayaraq, yenə də çempionluğa əsas namizəd “Qarabağ”dı.

“Neftçi”nin oyunu haqda isə çox danışmağa ehtiyac görmürəm. Klubdakı dəyişikliklərə baxmayaraq, reallıq odu ki, “ağ-qaralar” hələ də ötən mövsümdəki performansını davam etdirir. Ötən mövsüm də “Araz-Naxçıvan”la oyunlarda çətinlik çəkən “Neftçi” bu dəfə son dəqiqə qoluyla bir xal qazandı. Hələ həmin qolun “feyr-pley” qaydalarına nə dərəcədə uyğun olması da söhbət mövzusudu. Muxtar Respublika təmsilçisi bu oyunda daha üst sıralara yüksələ bilmək potensialına sahib olduğunu göstərdi.

Avrokuboklardan qopan “Sabah”ın artıq çempionata fokuslandığını demək mümkündü. “Sumqayıt” “bayquşlar”dan daha tez Avropa ilə vidalaşsa da, hələ də toparlanmaqda çətinlik çəkir. Komandada heyət yetərsizliyi ilə yanaşı, ruh düşkünlüyü də var. “Kimyaçılar”ın bu mövsüm nə qədər iddialı ola biləcəyini öyrənmək üçün ən azı daha iki tura ehtiyac olduğunu düşünürəm. Krunoslav Renduliçin rəhbərliyi altındakı “bayquşlar”ın avrokuboklardakı son oyunlarını nəzərə alaraq, çempionluğa aşkar namizəd olduğunu söyləməyə çəkinirəm.

“Zirə”nin də Nikosiya darmadağının təsirindən çıxa bilmədiyini gördük. “Qartallar”ın bu ab-hava ilə “Omoniya”ya qarşı Bakıdakı cavab görüşündə necə təsir bağışlayacağı sual altındadı. Ümid edirəm ki, məğlubiyyətə baxmayaraq, komandasının oyunundan razı qalan Rəşad Sadıqov bu görüşdə istədiyini müəyyən qədər ala bilib. “Şamaxı”nın isə hücum xəttində nə qədər təhlükəli ola biləcəyini gördük. Yeni transferlər yetərincə effektli idi. “Şirlər” hücumla yanaşı, müdafiədə də yaxşı təsir bağışladı.

Misli premyer-liqası
1-ci dövrə, 4-cü tur
23 avqust
Səbail – Kəpəz 4:0
24 avqust
Qarabağ – Turan Tovuz 0:1
Araz-Naxçıvan – Neftçi 1:1
25 avqust
Sabah – Sumqayıt 3:1
Zirə - Şamaxı 0:1

1. Turan Tovuz 4 3 1 0 5-0 10
2. Sabah 4 2 1 1 7-5 7
3. Qarabağ 3 2 0 1 7-2 6
4. Zirə 3 2 0 1 6-2 6
5. Sumqayıt 4 2 0 2 5-5 6
6. Səbail 4 1 1 2 7-7 4
7. Şamaxı 3 1 1 1 3-3 4
8. Araz-Naxçıvan 3 1 1 1 3-5 4
9. Neftçi 4 0 3 1 2-4 3
10. Kəpəz 4 0 0 4 0-12 0

Bombardirlər: Davit Volkov (Zirə) – 3, Riçard Almeyda (Qarabağ), Xəyal Nəcəfov (Turan Tovuz), Ayman Bouali, Suleyman Alluş (hər ikisi "Səbail"), Namik Ələskərov (Sabah) – 2.

Növbəti turun proqramı
30 avqust, 17.45. Turan Tovuz – Səbail
30 avqust, 20.00. Sumqayıt – Araz-Naxçıvan
31 avqust, 17.00. Şamaxı - Neftçi
31 avqust, 19.30. Kəpəz - Sabah
1 sentyabr. 20.45. Zirə - Qarabağ

KAMAL SƏFƏR