C liqasının 3-cü qrupunda 2-ci turun oyunlarından sonra şərikli liderlik formalaşdı.

İlk turda öz aralarında UEFA-nın məlum qadağası səbəbindən neytral meydanda - Macarıstanın Zalaeqerseq şəhərində keçirilən matçda qolsuz heç-heçəyə razılaşan Belarus və Bolqarıstan komandaları növbəti oyunlarını qələbə ilə başa vurdular.

Nəhayət, Belarus yığması 2024-cü ildə ilk dəfə qalib gəldi. Karlos Alosun çalışdırdığı komanda 5 oyunluq qələbəsizliyə Lüksemburqda son qoydu. Qonaqlar matça fəal başlasalar da, çox keçmədən ev sahibləri təşəbbüsü ələ aldılar. Topa uzun müddət nəzarət edən lüksemburqlular hesabı açmaq üçün bir neçə şans əldə etdilər. Lakin imkanlardan yararlana bilmədilər. Fasilədən sonra meydandakı vəziyyət dəyişdi. Qətiyyətli hücumlar təşkil edən belaruslar Morisin qoruduğu qapı qarşısında təhlükəli anlar yaşatmağa başladılar. Bir neçə yaddaqalan həmlədən sonra hesabı da açdılar. Alosun əvəzləməsi bəhrə verdi: meydana 67-ci dəqiqədə çıxan hücumçu Qromıko çox keçmədən Peçeninin ötürməsi ilə komandasını önə keçirdi. Sonuncunun matçın ən yaxşı oyunçusu adına layiq olduğunu da qeyd edək.

Qrupun digər oyunu da favoritin qələbəsi ilə sona çatdı. Amma Bolqarıstan yığması Şimali İrlandiyaya evdə çətinliklə qalib gəldi. Qonaqlar oyun planında slavyanlardan heç də geri qalmadılar. Hətta topa sahibolma üzrə bolqarları azca üstələdilər. Lakin ən vacib işi meydan sahibləri bacardılar: Despodov fasilə ərəfəsində Kolevin ötürməsini qola çevirdi. İkinci hissədə komandaların hesabı dəyişmək üçün etdiyi cəhdlər bir nəticə vermədi.

C liqası, 3-cü qrup
2-ci tur
Lüksemburq - Belarus 0:1 (0:0)
Lüksemburq: Moris, Yans (Pinto, 46), Coqoviç (Rupil, 83), Şano, Karlson, Bonert (Mahmutoviç, 65), Martins, Barreyro, Olesen (S.Till, 46), Muratoviç, Sinani.
Belarus: Lapouxov, Karpoviç (Kovalyov, 67), Volkov, Martınoviç, Zabelin, Selyava (Yablonski, 46), Ebonq, Peçenin, Baxar (Kireyev, 42), Şikavka (Barkovski, 85), Antilevski (Qromıko, 67).
Qol: Qromıko, 76.
Vərəqələr: Bonert, 45. Ebonq, 53. Martınoviç, 71. Kovalyov, 84. Şano, 86. Martins, 89 - sarı.
Hakim: Lourens Visser (Belçika).
8 sentyabr. Lüksemburq. 6820 tamaşaçı.

Bolqarıstan - Şimali İrlandiya 1:0 (1:0)
Bolqarıstan: Mitov, Popov, Atanasov, A.Petkov, Kostadinov (Petrov, 78), Qruyev, Nürnberger, Kirilov (Dimitrov, 72), Kolev (Ahmedov, 63), Despodov (S.İvanov, 78), M.Minçev (Panayotov, 72).
Şimali İrlandiya: Pikok-Farrell, Makneyr (Marşall, 73), Levis, Braun, Ballard, Hyum (Makkausland, 83), Bredli, Sevill (Smit, 73), Prays (Makkann, 83), Ş.Çarlz, D.Çarlz (Laveri, 59).
Qol: Despodov, 40.
Vərəqələr: Ş.Çarlz, 27. Makneyr, 29. Bredli, 59. Ahmedov, 78. Hyum, 81. Nürnberger, 90+1. Kolev. 90+3 - sarı.
Hakim: Tasos Sidiropulos (Yunanıstan).
8 sentyabr. Plovdiv. 14300 tamaşaçı.

1. Belarus 2 1 1 0 1-0 4
2. Bolqarıstan 2 1 1 0 1-0 4
3. Şimali İrlandiya 2 1 0 1 2-1 3
4. Lüksemburq 2 0 0 2 0-3 0

12 oktyabr: Bolqarıstan – Lüksemburq, Belarus - Şimali İrlandiya.