Avrokuboklarla bağlı ənənəyə bu dəfə də sadiq qaldıq. Daha doğrusu, təsnifat mərhələləri bitmədən təmsilçilərimizdən üçü mübarizəni dayandırdı. İndi bütün diqqətimiz “Qarabağ”a yönəlib. Elə isə ağdamlıların ümumi durumuna nəzər salmaqda fayda var.

“Köhlən atlar” yola Avropa Liqasının liqa mərhələsində davam edəcək. Lakin Çempionlar Liqasında qazandığı nəticələri də gözardı etmək olmaz. Statistiklər üçün qeyd edim ki, komanda avrokuboklarda keçirdiyi 6 matçda 15 qol vurubsa, 9-nu buraxıb. Siyahıda 3 qələbə, 3 məğlubiyyət var. Göstəricilər ölkə futbolunun səviyyəsi üçün yetərincə yaxşı olsa da, məhz “Qarabağ”ın prizmasından baxsaq, daha çoxunu tələb etməliyik. Xüsusilə ona görə ki, “köhlən atlar” “Dinamo”ya azı bir qol vurmalı, ən pis halda 30 minə yaxın azarkeşinin önündə “mavilər”i məğlub etməliydi. Niyə alınmadı? Səbəb çoxdu.
Juninyo cavab görüşündə zəif təsir bağışladı. Onu ya hansısa yağlı təklif düşündürür, ya da “Dinamo”nun müdafiəçiləri gözünün odunun almışdı. İlk oyunda Romao çox sərt oyuna görə qırmızı vərəqə almaq təhlükəsiylə üzləşmişdisə, ikincidə Medina bundan xilas ola bilmədi. Komanda müdafiə xəttində boşluqlara yol verdisə, birəbeş cəzalandı. Bəhlulun hər iki matçda zəif çıxışı bir yana, Qurban Qurbanovun Toralı yox, Elvini start heyətində görməsi sual doğurur. Axı Bayramov çoxdan Cəfərquliyevin mövqeyini “oğurlayıb”. Ümumiyyətlə, Elvin yerdə qalan “Dinamo”lu futbolçunun üzərinə getməklə, hətta tüpürməklə hələ “yetişmədiyini” sübut etdi. İgid basdığını kəsməz. Belə hallar nəinki futbolun etik qaydalarına, milli mentallığımıza da ziddi. Hələ bir neçə gün əvvəl həmin “Tofiq Bəhramov”da “Ludoqorets”in futbolçularını oxşar əməllərə görə qınamırdıqmı?

Qurban bəyə gəlincə, mütəxəssisin ilk oyunda yalnız bir əvəzetməylə yadda qalması günah idi. Daha böyüyü isə bu dəfə 78-ci dəqiqəyə qədər start heyətinə güvənmək oldu. Kreativ Cicanın yox, monoton Keytanın meydana çıxması da ayrı müzakirə mövzusudu. Zubir, sadəcə, təcrübəsi hesabına nəsə etməyə çalışdı. Bu qədər cəhd, canfəşanlıq qolla nəticələnmirsə, bütün göstəricilərdə rəqibdən üstün olmağın faydası nədi?

“Qarabağ”ın transfer çalışmalarında da çatışmazlıq var. Bəli, Mateuş Koxalski məhz avrokuboklarda uğur qazanmaq məqsədilə alınıb. Emmanuel Addai isə “sirli qutu”du. Bəs qalanlar? Musa, Şahruddin və Buntiçin xidmətinə, çox güman, premyer-liqada müraciət ediləcək. Onlar Avropa meydanlarında görünmək istəyirsə, yalnız məcburi əvəzetmələrə ümid etməlidi. Əlbəttə, belədə “köhlən atlar”ın ÇL-in liqa mərhələsi üçün şansları minimum idi. İndi növbəti transferlər gözlənilir. Qurban Qurbanov deyir ki, alınmasa, əlimizdə olan heyətlə yola davam edəcəyik. “Köhlən atlar”ın irəlidə üç cəbhədə mübarizə aparmalı olduğunu nəzərə alsaq, say baxımından ciddi çətinlikdə üzləşəcəklərinə şübhə yoxdu. Üstəlik ehtiyat oyunçular skamyasınd layiqli əvəzedicilərin sayı çox deyil. Qısası, söhbət avrokuboklardan, həmçinin ötən mövsüm AL-in 1/16 finalına qədər məsafə qət edən kollektivin bu dəfə daha çox irəliləmək niyyətindən gedirsə, ciddi addımlar atılmalıdı. İki yol var. Birincisi ayağı yorğana görə uzatmaqdısa, ikincisi boyundan yuxarı tullana bilmək üçün əməli addımlar atmaqdı.

Bəli, “Qarabağ”ı “Dinamo”nu mübarizədən kənarlaşdıra bilmədiyinə görə qınamaq çətindi. Amma etiraf edək ki, hər şey fərqli ola bilərdi. Görünür, premyer-liqanın zirvəsi “Qarabağ”, “Qarabağ”ın zirvəsi isə elə Avropa Liqasıdı. Yəni çempion Çempionlar Liqasına hazır deyildi!

KƏNAN BAHADIR