Yeni mövsümün ilk 4 turunun ümumilikdə səliqəli keçdiyini deyə bilərik.

Hesabat turu da bu mənada istisna olmadı. Hakimlər 26 dəfə əlini cibinə atsa da, heç kim meydandan qovulmadı. Amma 26 sarı vərəqədən onunun bir oyuna – “Araz-Naxçıvan” – “Neftçi” qarşılaşmasına təsadüf etməsi yaxşı hal deyil. Ümumiyyətlə, meydana çıxan 10 komandanın hər birinin futbolçuları cəzalandı. Təbii, baş məşqçilərin müəyyən məqamlarla bağlı narazılıqlarını da eşitdik.

Səbail – Kəpəz, RAUF ALLAHVERDİYEV
Turun açılış oyununda “Kəpəz”in darmadağın olunması fonunda hansısa hakim səhvi görünmədi. Allahverdiyev epizodlara yetərincə yaxın idi, hadisələrin axarına nəzarət edirdi. Üç sarı vərəqə göstərdi ki, buna görə referiyə irad tutmaq çətindi. Allahverdiyevin köməkçiləri də işinin öhdəsindən layiqincə gəldi.

Qarabağ – Turan Tovuz, FƏRİD HACIYEV
Bu görüşdə “Qarabağ”ın məğlubiyyəti ilə yanaşı, Qurban Qurbanovun referiyə kəskin etirazı da gözlənilməz oldu. Adətən, onun komandasının məğlub olduğu oyunlarda belə soyuqqanlılığını itirmədiyini görmüşük. Oyunsonrası mətbuat konfransında isə Qurbanov ofsayda görə etiraz etdiyini bildirdi, eyni zamanda, cüzi ofsaydın olduğunu etiraf etdi. Bu üzdən Hacıyevin doğru qərar qəbul etdiyi aşkardı. Oyunda təyin edilən penaltilərə gəlincə, birinci epizodda sərt mübarizəyə, ikinci epizodda isə açıq şəkildə əllə oyuna görə hər iki qərarın haqlı olduğunu deyə bilərik. Futbol ictimaiyyətinin diqqətini çəkən matçda hakim idarəçiliyinin yetərincə qənaətbəxş saymaq olar.

Zirə - Şamaxı, KAMAL UMUDLU
Ötən mövsüm hakimliklə bağlı ən çox narazılıq edən məşqçilərdən biri olan Rəşad Sadıqovun yeni mövsümdə ilk etirazı bu qarşılaşmaya tuş gəldi. Məğlubiyyətin ardından baş məşqçi 2-ci hissəyə artırılan vaxtın (7 dəqiqə - red.) azlığından şikayətləndi. Onu haqsız saymaq olmaz. “Zirə”nin sayılmayan qoluna görə VAR-la məsləhətləşmə uzun çəkdi, qonaq futbolçular tez-tez yerdə qaldığından həkimlər meydana daxil oldu. Sadıqov bu iradında haqlıdısa, amma Umudlunun bütün həlledici qərarlarının düzgün olduğunu da söyləmək mümkündü.

Araz-Naxçıvan – Neftçi, İNQİLAB MƏMMƏDOV
Söhbət turun ən qalmaqallı oyunundan gedir. Meydanda yaşanan 90 dəqiqəlik gərgin mübarizənin və idarə edilməyən emosiyaların fəsadlarından xəbərdarsız. Belədə təbii ki, ədalət təmsilçisinin məsuliyyəti birəbeş artdı. Ürəkaçan məqamdı ki, Məmmədov çiyinlərindəki yükün altında əzilmədi. Düzdü, o, matçboyu sərt oyuna qarşı çıxdı. Lakin futbolçuların xeyli epizodda təmkinli davranmaması “fit sahibi”nə müəyyən qədər haqq qazandırmağımıza səbəb olur. “Neftçi” qol vurandan sonra yaşanan məlum hadisələr zamanı idarəetməni itirməməsi və vəzifəsinin öhdəsindən gəlməsi təqdirəlayiqdi. Düzdü, İnqilab bəy ehtirasları, bir qayda olaraq, vərəqə hesabına sakitləşdirirdi ki, bu da heç bir hakim üçün yaxşı sayılmır. Nəticə: 10-u futbolçulara göstərilməklə ümumilikdə 13 sarı və qırmızı vərəqə!

Sabah – Sumqayıt, ELÇİN MƏSİYEV
Masazır qarşılaşması baxımlı və zövqlü keçdi. Bu mənada matçı qalanlarından fərqləndirə bilərik. Ona görə ki, “Sabah” qollar vurmaq üçün ciddi qayda pozuntularına ehtiyac duymadı. Hesabda geri olan “Sumqayıt” da hakim tərəfindən cəzalandırılmaq istəmir, təmkinli və xarakterli oyun göstərməyə çalışırdı. Komandaların qaydalara uyğun performans sərgiləməsi Məsiyevin də işini asanlaşdırdı. “Fit sahibi” cəmi üç futbolçunu cəzalandırmaqla ədaləti təmin etdi. Belə “sakit təbiətli” matçda Samir Abasovun emosiyalarının həddən artıq gərgin olması isə anlaşılan deyildi. Hakim mütəxəssisin öhdəsindən “sarı”yla gəldi. Abasovun Elçin bəydən narazılıq etməməsi də oyuna güzgü salır. Qısası, Məsiyev maraqlı duelin idarəçiliyinə görə yaxşı qiymət alacaq.