"Zirə" bu gün Konfrans Liqasının pley-off mərhələsinin cavab oyununda meydana çıxacaq.

"Qartallar" amansız "Omoniya"nı qəbul edəcək. Oyun "CBC Sport"un efirində canlı yayınlanacaq.

Konfrans Liqası
pley-off, cavab oyunu
Zirə - Omoniya (Cənubi Kipr) 1:0
Rafael Utziq, 79.
Hakimlər: VİTALİ SPASYONNİKOV, Raymond Tatrix, Artur Şakurov, Aleksandr Anufriyev (hamısı Latviya).
29 avqust. Bakı. "Liv Bona Dea Arena". Saat 20.00.
İlk oyun - 0:6.

Bəli-bəli, amansız "Omoniya"! İlk oyunda "Zirə"nin qapısına 6 cavabsız qol vuran komanda indi Bakıda meydana çıxacaq. Sirr deyil ki, belə nəticə cavab oyununu formallığa çevirib. "Qartallar" meydana yalnız təsəlli qələbəsi üçün çıxa bilər. Bu dərəcədə ümidsizlik məqsədəuyğun olmasa da, məntiqəuyğundu. Gərək "Zirə" bizdən inciməsin. Nəinki Nikosiyada, Misli premyer-liqasının 4-cü turunda "Şamaxı"ya qarşı (0:1) göstərilən performans da ürəkaçan səviyyədə deyildi.

Görünür, baş məşqçi Rəşad Sadıqov komandasını psixoloji sarsıntıdan ayılda bilməyib. Çox güman, bunun üçün uzun müddət lazım olacaq. Xüsusilə yerli futbolçuların yetərsizliyi gələcək üçün ümid vəd etmir. Həmçinin hesab bizi belə danışmağa vadar edir. Yenə də təslim olmaq ancaq ilk oyunun davamını izləməyimizlə nəticələnə bilər. Odu ki, "Zirə" fərqli davranmalıdı. Qələbəyə ümid etmək vacibdi. Ən azı, normal, gözümüzün öyrəşdiyi oyun sərgiləməklə avrokubokların qapısını möhkəm çırpmaq olar. Belədə mövsümün sonunda yenidən həmin meydanlara qayıtmaq, bu dəfə daha yaxşısını bacarmağa inanmaq keyfiyyətləri özünə büruzə verə bilər.

"Omoniya"ya gəlincə, komanda yaxşı ab-havadadı. Niyə də olmasın?! "Yoncalar" avrokubokların yeni mövsümündə hələ "sülh"ə belə razılaşmayıb. Qələbələri sıralayan rəqib Cənubi Kipr çempionatına da uğurlu start verib. Daha dəqiq desək, srağagün keçirilən 1-ci tur matçında "Etnikos Axnas"ı darmadağın etməklə (3:0) Bakıya qalib kimi yollanmağa nail olub. "Omoniya"nın heyətində zədəli və cəzalısı yoxdu. "Zirə"dən İsmayıl İbrahimli isə zədəli olduğundan cavab oyununu buraxacaq.

Əslində "yoncalar"ın cavab oyununa ciddi yanaşmayacaqlarını düşünmək olardı. Lakin komandanın məğlubiyyətsiz oyunlar seriyasını artırmaq və rekorda doğru irəliləmək şansı çox olduğundan Bakıda da qələbə uğrunda top qovacağını proqnozlaşdırmaq olar. Biz isə "Zirə"nin azarkeşlərin dəstəyi altında layiqli oyun sərgiləyəcəyinə inanmalıyıq.

KƏNAN BAHADIR