“Mən gördüyüm “Dinamo” ilə indiki arasında yerdən göyə qədər fərq var. O vaxt keyfiyyətli futbolçuları vardı. Luka Modriçin 20 yaşı vardı, elə o hamıya bəs idi. Mən "Xəzər Lənkəran"da baş məşqçi olanda evdə  "Dinamo" ilə 1:1 oynadıq. Cavab görüşündə də 1:0 udurduq. 67-ci dəqiqədə oyunçumuz meydandan qovuldu. İki oyunçu hava mübarizəsində toqquşdu, futbolçumuza vərəqə verildi. Ona görə də 50 dəqiqədən çox azlıqda oynadıq. Ev oyunumuzda da ilk yarıda Emin Quliyevi meydandan qovdular, amma o düzgün qərar idi. Hətta orda 86-ci dəqiqədə də Zaur Ramazanov qol vurdu, fikir verdim, laysman qaçdı, amma dayandı, sonra bayraq qaldırdı, ofsayd verdi. Sonradan gördük ki, heç bir oyundankənar vəziyyət yoxdu. Onlar əlavə vaxtda yaxşı oynadılar. Bir xatirə danışım. Deməli, həmin bu “Maksimir” stadionunda oyunöncəsi məşqə çıxdıq. Məşqdən sonra hamı getdi, mən ətrafa göz gəzdirdim. 2-3 meydança var idi, hamısı da təbii ot örtüklü. Gördüm ki, bir meydançada işıq yanır, yaxınlaşıb baxdım, uşaqlar futbol oynayırdı. Yanımda bir nəfər vardı, onlardan soruşdu ki, bu nə oyundu? Sən demə, Xorvatiyada 12 yaşlıların çempionatı gedirdi. 12 yaşlılar axşam saat 8-in yarısında, işıq altında oynayırdılar. Düşündüm ki, bizdə heç vaxt  belə şey ola bilməz. Meydana çıxanda gördüm ki, təbii otdu. Hər bir xorvat uşağın futbola gələndə bir fikri var - xaricə çıxmaq. "Dinamo"nu çıxmaq şərti ilə qalan klublarda maliyyə durumu aşağı səviyyədədi. Uzağa getməyək, "Zirə" ilə qarşılaşan "Osiyek"in futbolçularından 4-5-i 20 yaşlı uşaqlar idi. Yəni onların sistemi başqadı. Futbolçu yetişdirir, satır və klub yaşayır. Bizdə isə başqadı”.

“İndiki "Dinamo" işgüzar komandadı. Deyim ki, "Qarabağ" oynadı, amma "Dinamo" uddu. Hələ mənim yadıma gəlmir ki, avrokubok oyunlarında bir komanda bu qədər qol vəziyyəti yaratsın, amma birindən də istifadə edə bilməsin. Qollarda bizimkilərin mövqe səhvləri oldu. Bunlar Azərbaycanda bağışlanır, amma Avropada yox. 3:0 ağır hesabdı, ancaq mən ümidliyəm. "Qarabağ" burda da qol vəziyyətləri yarada və yararlana bilər. Düşünürəm ki, burdakı oyunda rəqib qapanacaq və əks-hücumlara əl atacaq. Bu yöndə işləmək, təhlil aparmaq lazımdı. Amma 3-cü qol artıq idi. Məsələn, 2:0-da böyük ümid ola bilərdi. Ağdam klubunu birinci oyundakı çıxışı geridönüş edəcəyinə inandırır. Qapıçı Buntic normal oynadı, qollarda onun heç bir səhvi yox idi. Komanda olaraq da normal mübarizə apardılar. Sağ və sol müdafiədə mövqe səhvləri oldu. Qapıçı topu qaytarırsa, müdafiəçi hara baxır? Harda dayanıb? Birinci qol həmin səhv üzündən oldu. Sonra bir neçə dəfə də müdafiəçilərimiz səhvə yol verdi. "Qarabağ" öz oyununu oynadı, sadəcə, rəqib uddu. "Qarabağ"ın bu heyəti, yeni  komanda Çempionlar Liqası üçündü. Həm oyunçular, həm məşqçilər korpusu bunu bacarar. Gərək hər qol imkanından istifadə edəsən. "Qarabağ"ın indiki oyunu Çempionlar Liqasına layiqdi”.