“Oyunla bağlı danışılacaq çox şey yoxdu. Çünki ortada bir oyun yox idi. "Zirə"nin nə oynamaq istədiyini, planının nədən ibarət olduğunu heç birimiz başa düşmədik. Məlum oldu ki, Rəşad Sadıqovun məşqçilik təcrübəsi hələ ki bu mərhələyə qədər çatır. Bundan sonrakı mərhələ üçün hələ də inkişaf etməli, öz üzərində işləməli, böyüməlidi. Düzdü, bura qədər gəlmək də az iş deyildi. "Şerif"lə başabaş oynadılar, "DAK 1904", ardından "Osiyek" keçildi. Yəni bunlar elə-belə rəqib deyildi. Görünən odu ki, “qartallar” "Omoniya"nı keçəcək gücə, potensiala malik deyil. "Zirə"nin oyunçu səviyyəsinin də bir yerə qədər olduğu srağagün ortaya çıxdı. Ola bilər, məşqçi səhv edir, hansısa taktiki gedişi düz deyil. Amma meydanda futbolçular oynayır. Bir hücumu dəf edərkən iki futbolçu - həm Ruan Renato, həm də Fuad Bayramov topu özündə saxlaya, müdafiədən uzaqlaşdıra bilmirlərsə, baş məşqçi neyləsin. Adi top qəbuletmə, özlərində saxlamaq qabiliyyətləri yoxdusa və topu rəqibə verərək ona şans yaradırlarsa, burda məşqçilik bir şey yoxdu. Baş məşqçi onların yerinə meydana çıxıb futbol oynayası deyil ki?! Rəşad Sadıqov oynadığını oynayıb, bacarığını da göstərib. Bəli, Sadıqovun səhvi var. Qısası, "Zirə"nin bir klub kimi böyüməsi lazımdı. Futbolçu kontingenti, heyət daha da yaxşılaşdırılmalıdı, gələn mövsüm üçün daha da gücləndirilməlidi. Çünki bu heyətlə bundan artığına nail olmaq mümkün deyil. Xüsusilə də "Zirə"də yer alan azərbaycanlı futbolçuların səviyyəsi çox aşağıdı. Biz bir həqiqəti də anladıq ki, "Qarabağ" olmasa, Azərbaycan futbolunun səviyyəsi  bura qədərdi. Ötən mövsüm "Zirə" həm çempionatda, həm də ölkə kubokunda yalnız və yalnız "Qarabağ"dan geri qalıb. "Qarabağ"ın səviyyəsini bilirik, həmişə deyirik ki, Azərbaycan yox, Avropa klubudu. Bunu bir kənara qoysaq, deməli, Azərbaycan çempionu "Zirə"di. Onun heyətində oynayan futbolçular isə top qəbul etməyi bacarmırlar. Azərbaycan futbolunun səviyyəsi budu. Təkcə yerlilər yox, başqaları da bu səviyyədədi. Azərbaycan futbolunun səviyyəsi Konfrans Liqasının pley-offundan geri dönməkdi. Bu, acı reallıqdı. Belə çıxır ki, son 15-20 ildə "Qarabağ"ı, arada "Qəbələ" və "Neftçi"nin müəyyən uğurlarını çıxmaq şərti ilə ölkə futbolunun səviyyəsi artmayıb, heç bir yerə gedib çıxmayıb, elə yerində də qalıb. AFFA srağagünkü matçı böyük bir siqnal kimi qəbul etməlidi. Azərbaycan futbolu pis vəziyyətdədi, nəsə eləmək, qolları çırmalayıb işə başlamaq lazımdı”.