Bəli, “Sabah” “doğma divarlar” arasında uduzaraq Konfrans Liqasında mübarizəni dayandırdı. Nəinki meydanda, tribunalarda da ruhsuz, ümidsiz və “cansız” atmosfer gördük.

Düzdü, oyundan əvvəl azyaşlı tərəfdarların iştirakıyla əyləncəli oyunlar keçirildi. Burda qalib olanlar müxtəlif hədiyyələr qazandı. Lakin oyun zamanı başverənlər o qədər də ürəkaçan olmadı.

Bilindiyi kimi, “Makkabi” ilə cavab matçında “Bank Respublika Arena”da anşlaq yaşanmış, azarkeş rekordu qeydə alınmışdı. Görünür, komandanın sonradan gözləntiləri qarşılamaması ümidləri azaldıb. Matçın startına dəqiqələr qalmış “Sabah”ın mətbuat xidmətinin rəhbəri Elnur Həmidovdan aldığımız məlumata görə, 6500 bilet satılmışdı. Baxmayaraq ki, stadion 8700 yerlikdi. Üstəlkik matçı tribunadan izləyənlərin sayı 6132 nəfər oldu. Bununla yanaşı, “bayquşlar”ın buraxdığı ilk qoldan sonra azarkeşlər yavaş-yavaş tribunaları tərk etməyə başladı. Bu hələ harasıdı?! Söhbətləşdiyim tərəfdarlardan bir neçəsi çalışdığı yerlərdən onlara pulsuz bilet paylandığını dedi. “Sabah”ın fanklubu “Soldati di Sabah” da fəal deyildi, komandaya istənilən dəstəyi vermədi. Yalnız Xəyal Əliyev meydana çıxarkən varlığı hiss olunan minlərlə azarkeşin alqışları stadionu başına götürdü. Tribunada əyləşənlər nə ruhlandırıcı şüarlarla yadda qaldılar, nə də azarkeş varlığını əsk etdirən xoreoqrafiya və ya pankart gördük. Ümumiyyətlə, onlara azarkeşmi deyək, izləyicimi? O bəllidi ki, belə azarkeşlik olmur!

Bu başqa məsələ ki, “Sabah” oyunuyla heç nəyi haqq etmirdi. Rəqibi dəstəkləməyə gələn irlandiyalı azarkeşlərin sayı isə təxminən 20 nəfər idi. “Tallaght Saints” (“Tallaght müqəddəsləri”) və “Liberty Saints” (“Azadlıq müqəddəsləri”) fanklubları tribunada yer almışdı. Əlbəttə, “Sent Patriks” qələbəni onlarla qeyd etdi. “Sabah”ın uğuru, Respublikanın qüruru” sözlərinin yazıldığı tribunanın qarşısında!

Oyunsonrası mətbuat konfransında diqqətçəkən məqam isə Renduliçin xoşbəxtliyi idi. Arxayın davranışı və gülərüz sıması anlaşılan deyildi. Nə zarafatlarını əsirgədi, nə də kefinə soğan doğranmış halda idi. İnanın mənə, “Sent Patriks”in baş məşqçisi Stiven Kenni belə onun qədər rahat görünmürdü.

KƏNAN BAHADIR