“Hər kim bu təklifi irəli sürübsə, onunla razıyam. Doğrudan da, ötən mövsümdəki maliyyə ilə hərəkət etmək mümkün deyildi. Bunu yaşadıq və gördük. Əminliklə deyirəm ki, federasiyadan başqa kiminsə dəstəyi olmasa, klubu ayaqda saxlamaq çox çətindi. İndiki maliyyədən hər nə qədər artıq ayrılsa, bir o qədər yaxşıdı. Bilindiyi kimi, fərqli-fərqli bölgələrdə oyunlar keçiririk. Elə həmin səfər oyunları üçün böyük məbləğdə vəsait lazım olur. Demirəm ki, federasiya borcludu. Xeyr. Klubun öz vəsaiti olsa, daha yaxşı olar, ancaq o da yoxdu. Sponsor olmasa da, ən azı federasiya elə bir qərar qəbul etsin ki, komandalar hərəkət edə bilsin. Məsələn, “Kür-Araz”ın sponsoru yoxdu, heç olmayıb da”.

“AFFA inkişaf strategiyasının hazırlanmasıyla bağlı bizə təklif göndərib. Mən də Azərbaycan futbolunun inkişafıyla bağlı çox böyük bir təkliflər paketi hazırlamışam. Hələ ki avqustun 5-nə kimi vaxt var. Bu üzdən təkliflər paketinin üzərində işləyirəm. Daha sonra həmin təkliflərin bir çoxunu mətbuata da verəcəm. Bu, təkcə mənim beynimin məhsulu deyil. Həm də qonşu ölkələrin, o cümlədən də Türkiyənin futbolun inkişafıyla bağlı keçdiyi yolu təhlil etmişəm. Ondan sonra bütün klubların işinə yarayacaq təkliflər paketi hazırlamışam. 2-ci liqa tələsik yarandığına görə orda nəzərdə tutulan illik 50 min manat həqiqəti əks etdirmir. Futbolun İnkişaf Fonduyla (FİF) klublar arasında müqavilə var. Həmin müqavilə bağlanarkən klub nümayəndələrindən kimisə çağırıb, ən azı onların da fikirlərini öyrənmək lazımdı. Yəni aylıq 5 min manat nəyə əsasən müəyyənləşib? İnanıram ki, müqavilə imzalanarkən tələskənlik olub. 2-ci liqanın yaranmasıyla bir növ başqa bölgələr də ölkə futboluna daxil olub. Hesab edirəm ki, məsələyə yenidən baxmağın, yeni qərarlar verməyin zamanıdı. Həm də FİF ilə bağlanmış müqavilə qüsurludu. Həmin müqavilədə bir çox məsələlər nəzərdən qaçıb. Bu üzdən yeni müqaviləyə həmin çatışmazlıqları əlavə etmək lazımdı”.