"Əvvəla, AFFA-ya bizə göstərdiyi qayğıya görə minnətdarlığımızı bildiririk. Məbləğə gəlincə, peşəkar futbol klubunu saxlamaq üçün nə qədər çox vəsait ayrılarsa, bir o qədər yaxşıdı. 200 min manatla müqayisədə 300 min daha yaxşıdı. Amma bununla da keçinmək olmaz. Biz daim sponsor axtarışındayıq. Çünki xərclərimiz çoxdu, 200 min manatı güclə çatdırırıq. Stadionumuz təmir olunmalıdı, yeni ot örtüyünə ehtiyacımız var. Səfər oyunlarına gedirik deyə, əvvəlcədən avtobus tutulmalıdı, futbolçularımızın maaşı, qidalanması, zədələnəndə müayinəsi və başqa zəruri ehtiyaclarımız var. Heyətimizdə 8 gəlmə futbolçu var. Onlara elə məvacib verməliyik ki, komandada saxlaya bilək. Bundan başqa, aşağı yaş qrupları üzrə komandalarımızı formalaşdırmalıyıq. "Mingəçevir"in yaşamasını istəyiriksə, bunu mütləq etməliyik. Hazırda 12-13, 16 və 17 yaşlılardan ibarət komandalarımızın yaradılması istiqamətində işlər görürürk. Növbəti mövsümdən artıq bu komandalarımızın iştirakı nəzərdə tutulub. Bütün sadaladıqlarım da çoxlu xərc tələb edir. Ona görə yuxarıda vurğuladım ki, nə qədər çox pul ayrılsa, o qədər yaxşıdı. Bununla yanaşı, sponsor axtarışlarımız da davam edir. Minimum xərclərimizi qarşılayacaq sponsor tapsaydıq, vəziyyətimiz bir az da yaxşılaşardı".

"1-ci divizionun səviyyəsini götürsək, 300 min manat pis məbləğ deyil. Könül istərdi ki, daha çox olsun. Çünki komandada xırda detallardan tutmuş futbolçuların sağlamlığı, məvacibləri, səfər xərclərinə qədər hamısı puldu. Xərcləri güclə qarşılayırıq. Sağ olsun AFFA, onun yardımı olmasa, klubların ayaqda qalması, demək olar, mümkünsüz olar".

"300 min manat 1-ci divizionda normal komanda yaratmaq üçün kifayət deyil. Minimum 400-450 min ayrılmalıdı. Bundan başqa, Bakı və onun ətrafındakı komandalarla bölgə təmsilçiləri arasında da fərq olmalıdı. Məsələn, bizə bu mövsüm AFFA-dan 200 min ayrıldı. Bizim yalnız futbolçuların oteldə qalması, qidalanması və təyyarə xərcimiz 150 mindi. Ümumi büdcəmiz isə 200 mindən 1,5 dəfə çoxdu. Sözüm odu ki, klublar birbaşa AFFA-dan asılı olmamalı, özləri də sponsor axtarışında olmalıdı. Müasir dövrümüzdə futbol böyük biznesdi. Biz də ölkə futbolunda biznes layihələri hazırlamalıyıq. Zəngin iş adamlarını, sahibkarları, yüksək gəliri olan şirkətləri bu işə sövq etmək lazımdı. Bu gün futbolumuzun ən problemli tərəfi uşaq futbolunun olmamasıdı. Bu sahəni də inkişaf etdirmək üçün akademiyalar yaradılmalıdı. Akademiyaların minimum xərci isə 200-250 mindi. Uşaq futboluna yatırımlar etməsək, Azərbaycanda futbol inkişaf etməyəcək. Bundan başqa, hər bir klub uşaq komandalarından tutmuş peşəkar komandasına qədər ancaq yerli məşqçilərə və əlaqələndiricilərə güvənməli, onların savadlanması üçün müntəzəm xarici ölkələrdəki seminarlara, kurslara göndərməlidi. Qısası, müasir futbolun şərtlərinə uyğun peşəkar klub yaratmaq üçün güclü maliyyə dayaqları olmalıdı".

"AFFA-nın ayırdığı 200 min, həmçinin növbəti mövsüm üçün nəzərdə tutduğu 300 min manat birbaşa 1-ci divizionun səviyyəsinə uyğun klublara ödənilir. Amma bir klubu saxlamaq, minimum səviyyədə inkişaf etdirmək üçün ən azı 500 min, yaxşı komanda formalaşdırmaq üçün isə 1 milyon manat və daha çoxuna ehtiyac var. Bildiyiniz kimi, İmişlidə futbolu yenidən dirçəltdik, görüləcək çox iş var. Stadionumuz uzun müddət idi baxımsızlıqdan pis vəziyyətə düşmüşdü. Minimum standartlara cavab verməsi üçün hələ də əziyyət çəkir, xeyli vəsait xərcləyirik. Divizionda çıxış edən futbolçuların səviyyəsi premyer-liqanın biraddımlığında olmalıdı. Amma klubumuzdakı oyunçuların çoxunun elita təcrübəsi yoxdu və indi-indi təcrübə toplayırlar. Çox istərdim ki, "İmişli"də elita təcrübəsi olan futbolçular çıxış etsin. Bundan başqa, 10 yaşlılardan başlayaraq, 16-17 yaşadək komandaları yaratmalı, akademiya tikməliyik. 200-300 min manatla isə bunları etmək mümkün deyil. AFFA-nın ayırdığı pulla məşqçi və futbolçularımızın maaşını, səfər xərclərini güclə ödəyirik. Divizionda çıxışımıza icazə veriləndən sponsor axtarışındayıq, amma hələ bir nəticə yoxdu. Açığı, elita təmsilçilərinə güclə sponsor tapılırsa, aşağı liqa komandalarına iş adamları pul yatırmaqda heç maraqlı deyil. Ona görə gələcəkdə istərdik ki, sponsor tapana qədər AFFA 300 min manatdan daha çox vəsait ayırsın".

"AFFA-ın növbəti mövsümdən divizion təmsilçilərinə 300 min manat ayıracağına sevinirik. Ən azı 200 mindən daha çoxdu. 200 min, demək olar, xərclərimizi qarşılamır. Məbləğ o qədər azdı ki, nə istədiyimiz transferləri edirik, nə yaxşı toplanış keçirik, nə də başqa zəruri işləri görə bilirik. Qiymət artımı da işimizi çətinləşdirdi. Səfər oyunlarına çox xərcimiz çıxır. Məsələn, qiymət artımına qədər 100 manat xərc olurdusa, indi yarıbayarı çoxalıb. Heyəti də güclə qoruyuruq. 300 min manatın ayrılması işimizi bir qədər yüngülləşdirəcək. Amma peşəkarlaşmaq, uşaq futbolunu inkişaf etdirmək, aşağı yaş qrupları üzrə komandaları yaratmaq üçün 300 min kifayət deyil. Bunun üçün ən azı 500 min lazımdı. O qədər vəsait olsa, hətta infrastruktura da əl gəzdirərik, çox şeyi yeniləyərik. Klub rəhbərliyi sponsor axtarışında olsa da, hələ müsbətə doğru bir addım yoxdu".

"300 min manat divizion təmsilçiləri üçün olduqca az məbləğdi. Futbolçuların 10 aylıq maaşı, səfər xərcləri, sağlamlığı və əlavə xərcləri nəzərə alsaq, kifayət etmir. Bundan başqa, elita komandaları ilə divizion təmsilçiləri arasında hərtərəfli böyük uçurum var. Buna gecə-gündüz fərqi də deyə bilərik. Əslində isə 1-ci divizion komandaları premyer-liqa təmsilçiləriylə ayaqlaşmaq gücündə olmalı və bu fərq o qədər də böyük olmamalıdı. Bu gün premyer-liqanın autsayderi ilə divizionun liderini müqayisə etsək, onlar arasında ən azı 2-3 dəfə fərq görünəcək. Ona görə də diviziona daha yüksək məbləğ ayrılmalı, çempionatın səviyyəsi yüksəldilməlidi".