Bəzi ədalət təmsilçilərinin “kitabı bağlandı” - TFF-nin yeni prezidenti hakimlərə dəstək verdi
Türkiyə Futbol Federasiyasında baş verən rəhbər dəyişikliyinin ardından hakimlərlə bağlı maraqlı olaylar yaşanır.
Bilindiyi kimi, İbrahim Hacıosmanoğlu federasiya prezidenti seçiləndən sonra Ahmet İbanoğlu Hakimlər Komitəsinin (HK) sədri vəzifəsindən istefa vermiş və onu Fərhat Gündoğdu əvəzləmişdi. Bir neçə gün öncə yeni mövsümdə superliqada əsas hakim qismində çalışacaq 25 ədalət təmsilçisinin adları açıqlandı. Onların arasında FİFA hakimi Abdulkadir Bitigenin olmaması şok effekti verdi. Amma iş bununla bitmədi.
Bazar günü məlum oldu ki, Volkan Bayarslan bir müddət superliqa oyunlarına təyinat almayacaq. Halbuki onun adı 25 hakimin arasında var idi. Sən demə, Bayarslan FİFA-nın hakimlər üçün müəyyənləşdirdiyi fiziki testlərdən keçə bilməyib. Ona görə də o, ikinci testə qədər oyun idarə edə bilməyəcək. 46 yaşlı Bayarslan 2011-dən superliqa oyunlarına təyinat alır. O, FİFA hakimi statusunda deyil. Bundan başqa, iyulun 26-dan etibarən HK tərəfindən hakimlər üçün seminarlar təşkil olunur.
Bu seminarlar avqustun 3-nə qədər davam edəcək. Burda da diqqətçəkən məsələ var. İki yan xətt hakimi – Sərkan Ok ilə Aleks Taşçıoğlu, eləcə də 4 VAR hakimi – Hakan Ceylan, Mustafa Öğretmenoğlu, Sərkan Tokat və Koray Gənçərlər seminara dəvət olunmayıb! Halbuki onların hər birinin adı yeni mövsüm üçün açıqlanan siyahıda var idi. Hadisələrin belə axarından sonra Sərkan Ok ilə Aleks Taşçıoğlu karyerasını bitirmək qəırarına gəlib. Onlar Türkiyə çempionatında uzun illər Fırat Aydınusun köməkçiləri kimi oyunlara təyinat alırdı. Hakimlik mövzusunun davamı kimi bildirək ki, TFF-nin qərarı ilə ədalət təmsilçilərinin gəlirləri ikiqat artırılıb. Hakimlərin aylıq maaşı 20 min lirədən 40 min lirəyə, yəni bizim pulla təxminən 1000 manatdan 2000 manata yüksəldilib. Onların qonorarları da artıb. Artıq hakimlər idarə etdikləri hər oyuna görə 30 min yox, 60 min lirə qazanacaqlar.
Bu arada seminarda Hacıosmanoğlu da iştirak edib. O, hakimlərə dəstək nümayiş etdirib. Onun sözlərindən belə başa düşmək olar ki, artıq əcnəbi VAR hakimlərinə ehtiyac olmayacaq:
“Qarşımda sanki böyük bir ordu görürəm. 600 il dünyanı idarə etmiş bir millətin övladlarıyıq. Öz övladımıza güvənməyərək bu ölkəyə əcnəbi hakimləri gətirdik. Bu, tək sizə yox, bütün türk millətinə qarşı təhqirdi. Heç kimin inanmadığı bir işi bacararaq prezdent seçildik. Sizdən istədiyim yeganə bir şey var. O da ədalətli olmaqdı. Məncə, çətin bir şey deyil. Bu məsələdə iradə çox önəmlidi. O iradə bizdə var. Xəlil Umut Mələr Ankarada döyüldü. Halbuki bizi Avropada gözəl təmsil edən hakimdi. Balıq başdan iylənir. TFF-nin başında duran şəxs hakim qardaşlarımızı qorumağı bacarmalıdı. Biz hakimlərin arxasında dağ kimi duracağıq. Sizə ediləcək təhqir sizə yox, bu ailənin lideri olan mənə ünvanlanacaq. Klub prezidentlərinin Nizam-İntizam Komitəsinə sövq edilməsini yığışdırdım. Artıq istədikləri kimi açıqlama verə biləcəklər. Bunu siz hakimlərə güvəndiyim üçün etmişəm. Səhvə yol verməmək üçün əlinizdən gələni etməlisiz. Arxa planda sizi rahatlamaq, üzərinizdəki təzyiqi götürmək üçün biz də əlimizdən gələni edəcəyik”.
Digər xəbərlər
