“Sumqayıt”ın aparıcı oyunçularından biri də ötən mövsüm heyətinə cəlb etdiyi Roy Kehatdı.

İyulda transfer olunan israilli futbolçu “kimyaçılar”la artıq bir mövsümü geridə qoyub. O, geridə qalan mövsüm ərzində “Sumqayıt”ın heyətində 35 matça çıxıb və 7 qola imza atıb. Kehatın zəngin klub karyerası var. O, “Makkabi” (Təl-Əviv), “Kiryat”, “Netanya”, “Makkabi” (Hayfa) kimi yerli klublarda forma geyib, legioner həyatında isə Vyana “Austriya”sında çıxış edib. “Sumqayıt”a “Kiryat”dan gələn 32 yaşlı yarımmüdafiəçi Konfrans Liqasının 2-ci təsnifat mərhələsi çərçivəsində “Fehervar”la (1:2) qarşılaşmadan öncə “israelhayom” saytına müsahibə verib.

- Hansı çempionat daha yaxşıdı? İsrail, yoxsa Azərbaycan?
- Hansı çempionatın daha yaxşı olduğunu söyləmək çətindi. Hər iki çempionatda turnir cədvəlinin ortasında və aşağıda yer alan komandalar arasında güc balansı kifayət qədər bərabərdi. İsrail premyer-liqasında Hayfa və Təl-Əviv “Makkabi”si zirvəyə can atır. Azərbaycanda isə son illər çempionatın aşkar favoriti, Avropada da əla nəticələr göstərən “Qarabağ” var. Ötən il Avropa Liqasının 1/8 finalına yüksəlib, 90-cı dəqiqədə “Bayer-04”ə uduzub.

- Bəs çempionatlar arasında hansı fərqlər var?
- Fərq tamaşaçı sayındadı. Azərbaycanda hətta böyük komandalar üçün də çox tamaşaçı gəlmir. İsraildə meydançalar və stadionlar daha yaxşıdı. Burda “Qarabağ”dan başqa yerdə qalan komandalar arasında elə də böyük fərq yoxdu.

- Azərbaycandakı həyat tərzin necədi?
- Burda sakit həyat sürürük, öz mühitimizi yaratmışıq. Bakıda yaşayırıq və burda bizə lazım olan hər şey var. Yalnız bir şey çətindi: dil məsələsi. Ona görə ki, küçədəki adamların çoxu ingiliscə danışmır.

- Bəs, orda İsrailə və israillilərə münasibət necədi?
- İsraillilərə münasibət yaxşıdı, burda İsrailə qarşı heç bir şey görməyəcəksiz. Küçədə adamlarla danışsanız, onların əksəri sizə İsraillə Azərbaycanın yaxşı dost olduğunu söyləyəcək.

- Siz İrana yaxınsız. Bu bir qədər qorxulu deyilmi?
- Eşitdik ki, İrandakı Azərbaycan səfirliyinə hücum cəhdi olub, amma Allaha şükürlər olsun ki, İranla yaxın olsaq da, burda qorxu hiss etmədik.

- Qarşıdakı mövsüm üçün də “Sumqayıt”la müqavilə bağlamısız. Hiss olunur ki, orda yaxşı və sakit bir yer tapmısan. Eliada komanda tapmaq istəyirsənsə, niyə İsraildə yox, orda olmağı üstün tutursan?
- Ötən yay başqa komandaya getmək istəyirdim. Agentimdən xaricdə komanda tapmağı xahiş etdim. Təklif gələndə yer, liqa haqda soruşmağa və maraqlanmağa başladım. Yaxşı şeylər eşidən kimi gəlib özümü sınamaq istədim. Bu mövsüm də yaxşı olmağa davam etmək istəyirəm.

- Azərbaycanda daha bir neçə il davam etmək niyyətindəsən, yoxsa İsrailə qayıdacaqsan?
- Bilmirəm. Qarşıdakı mövsüm üçün müqaviləm.

- İsrail yığmasına yeni baş məşqçi təyin olunub. İstəyirsən ki, o da səni izləsin? Bəlkə səni milliyə dəvət etdi?
- Əla mövsüm keçirdim. Milli komandanın uğuru həmişə bütün ölkənin məqsədi olmalıdı.

KAMAL SƏFƏR