“Spartak” məğlubiyyət, “Zenit” inamlı qələbə ilə başladı - TURUN ŞƏRHİ
Ötən həftəsonu Rusiya premyer-liqasında yeni mövsüm start götürdü. Şənbəyə təsadüf edən ilk oyun günündə 4 qarşılaşma keçirildi. Turun və mövsümün açılış oyununda “Lokomotiv” debütant “Akron”u qəbul etdi. Tarixində ilk dəfə elitada çıxış edən Tolyatti təmsilçisi güclü rəqibinə layiqincə müqavimət göstərsə də, evə xalla qayıda bilmədi. 2010-cu ildən bəri ilk turlarda uduzmayan “Loko” oyunun sonlarında rəqibinin müqavimətini qıra bildi. Qələbə qolunu “Orenburq”dan transfer edilən Vorobyov hesabına yazdı.
Son illərin dəyişməz çempionu “Zenit” ilk oyunlardan etibarən rəqiblərin canına vəlvələ salmağa başlayıb. “Krasnodar”ı 4:2 məğlub edərək mövsümə superkuboku qazanmaqla başlayan Sergey Semakın komandası ilk turda çətin Samara səfərində 4 qol vuraraq şou göstərdi. Sankt-Peterburq nəhəngi ilk hissəyə 3 qol sığışdıraraq ikinci yarını formallığa çevirdi. Ümumiyyətlə, “Zenit”in bu rəqibə çempionatda ardıcıl 15-ci səfər oyununda uduzmadığını bildirək. Yeni transfer Qluşenkov mükəmməl məhsuldarlıq sərgiləməkdə davam edir. “Lokomotiv”dən transfer olunan istedadlı futbolçu superkubokda olduğu kimi, bu oyunda da dubl etdi. Qluşenkov XXI əsrdə “Zenit”in heyətində çempionatda debüt oyununda iki qol vuran ilk futbolçu oldu! Onu da bildirək ki, piterlilər ardıcıl 22-ci mövsümə məğlubiyyətsiz start verərək bu göstəricidə rekordu bir qədər də yaxşılaşdırdılar. “Zenit”in ilk turda uduzmasına sonuncu dəfə 2002-ci ildə “Anji” ilə oyunda rast gəlinib (0:2). Ötən mövsümün bürünc mükafatçısı “Dinamo” da yeni “futbol ili”nə qələbə ilə start verdi. Moskva təmsilçisi “Fakel”lə ev oyununda ciddi problem yaşamadı. Turun maraqla gözlənilən oyunlarından biri Rostovda keçirildi. Amma “Rostov”la ÇSKA-nın duelində qapılara qol vurulmadı. Maraqlıdı ki, “Rostov” ötən mövsüm bütün ev oyunlarında qol vurduğu halda, yeni mövsümün ilk ev oyunundaca qola həsrət qaldı.
Bazar günü isə favoritlər ümidləri doğrultmadı. Bir sıra əsas oyunçularını itirən və ötən mövsümlə müqayisədə bir qədər zəifləyən “Krasnodar” Qroznıda bərabərliyə razı oldu. “Spartak”da məşqçilər bir-birini əvəz etsə də, nəticə yaxşılığa doğru dəyişmir. Moskva nəhəngi Deyan Stankoviçin debüt oyununda gözlənilmədən səfərdə iddiasız “Orenburq”a uduzdu. Meydan sahiblərinin heyətində hesabına qol və məhsuldar ötürmə yazan türkiyəli vinger Əmircan Gürlük matçın ən yaxşısı seçildi. Premyer-liqada hesabına qol və məhsuldar ötürmə yazan sonuncu türkiyəli futbolçu 2017-ci ildə “Rubin”in heyətində Gökdəniz Karadəniz olmuşdu. Stankoviç “Spartak”ın başında premyer-liqaya qələbə ilə başlaya bilməyən ardıcıl 5-ci məşqçi oldu! Son 5 məşqçiyə nəzər salsaq, Rui Vitoriya, Paolo Vanoli və Stankoviç mövsümə məğlubiyyət, Domeniko Tedesko ilə Gilyermo Abaskal heç-heçə ilə start verib. “Ağ-qırmızılar”ın başında ilk çempionat oyununda qələbəyə sevinən son məşqçi 2018-də Oleq Kononov olub.
1-ci tur
Krılya Sovetov – Zenit 0:4
Qluşenkov, 6; 45+2. Kassyerra, 18. Pedro, 90+3.
Zenit: Latışonok, Karavayev, Yerakoviç, Nino, Santos, Barrios, Vendel (Yeroxin, 86), Artur (Qorşkov, 46), Qluşenkov (Sergeyev, 84), Mostovoy (Pedro, 74), Kassyerra (Mantuan, 74).
Axmat – Krasnodar 1:1
Çernikov, 43-öz qapısına – Krivtsov, 30.
Krasnodar: Aqkatsev, Batçi (Olusequn, 58), Tormena, Kayo, Kosta, Sa, Çernikov, Krivtsov (Yektov, 85), Kozlov (Pina, 46), Spertsyan, Smolov (Kobnan, 73).
Lokomotiv – Akron 3:2
Pinyaev, 28. Batrakov, 38. Vorobyov, 79 – Bakayev, 36. Eldaruşev, 40.
Lokomotiv: Lantratov, Nenaxov (Sarveli, 57), Silyanov, Nyamsi, Morozov, Tiknizyan (Rakov, 80), Barinov, Batrakov, Karpukas (Samoşnikov, 57), Pinyayev (Süleymanov, 69), Vorobyov (Saltıkov, 80).
Orenburq – Spartak 2:0
Peres, 62. Əmircan Gürlük, 67.
Spartak: Maksimenko, Denisov, Çernov, Babiç, Xluseviç, Umyarov (Zinkovski, 68), Zobnin, Zorin (Martins, 46), Bonqonda (Meleşin, 85), Medina (Uqalde, 46), Sobolev (İqnatov, 68).
Rostov – ÇSKA 0:0
ÇSKA: Akinfeyev, Qayiç, Diveyev, Roşa, Moyzes, Kruqovoy, Oblyakov, Bistroviç (Qayç, 80), Koyta (Zdelar, 54), Musayev (Jemaletdinov, 65), Çalov (Qlebov, 80).
Dinamo Mos. – Fakel 3:1
Lepski, 3. Nqamaleu, 21. Qladışev, 28 – Markov, 74.
Ximki – Dinamo Mah. 1:1
Zabalotnı, 51 – Şumaxov, 33.
Nijni Novqorod – Rubin 2:4
Ze Turbo, 3. Tsarukyan, 71 - Daku, 5. Zotov, 33. Vada, 42. Kabutov, 90+1.
Növbəti turun oyunları iyulun 26-28-i aralığında keçiriləcək: Krılya Sovetov – Rostov, Nijni Novqorod – ÇSKA, Rubin – Zenit, Dinamo Mos. – Lokomotiv, Fakel – Akron, Ximki – Spartak, Orenburq – Axmat, Krasnodar – Dinamo Mah.
Oyundan sonra
Sergey Semak, “Zenit”in baş məşqçisi:
“Hücum planında bu gün istədyimiz hər şeyi həyata keçirdik. Qol buraxmasaq da, müdafiədə müəyyən problemlər var idi. Amma bu, daha çox psixoloji məqamlardan qaynaqlanan problemdi. Çünki iki erkən qol vurandan sonra komandada istər-istəməz rahatlıq yaranır. 2-ci qoldan sonra bir müddət tempi və oyuna nəzarəti itirdik. Həmin anlarda “Krılya Sovetov” çox yaxşı təsir bağışlayırdı və qol vura bilsəydilər, işimiza çətin olacaqdı. Bəxtimizdən onlar fərqlənə bilmədi. Biz isə fasiləyə qədər 3-cü topu da vurduq. İkinci hissə ilə bağlı isə heç bir iradım yoxdu. Mövsümə qələbə ilə başlamaq həmişə xoşdu. Komanda yavaş-yavaş formaya düşəcək. Klaudinyonun əzələsində ağrılar olduğu üçün bugünkü oyuna hazır deyildi. Qluşenkov isə hələ ki ümidlərimizi artıqlamasıyla doğruldur. Bizə ötən mövsüm məhz belə yaradıcı futbolçu çatışmırdı. Bizim sistemimizdə özünə çox tez yer tapdı”.
Deyan Stankoviç, “Spartak”ın baş məşqçisi:
“İlk növbədə rəqibi təbrik edirəm. Hiss olunurdu ki, oyuna çox yaxşı hazırlaşıblar. Onların aqressiv və sürətli oyununa eyni şəkildə qarşılıq verə bilmədik. Uzun ötürmələrdən də çox yaxşı istifadə edirdilər. Təbii ki, “Spartak” bundan daha yaxşı oynamağa qadirdi. Oyunumuzu yaxşılaşdıra bilərik. Bu gün bizim futbolçular sanki məşqlərdə mənim izlədiyim oyunçular deyildi. Yeni məşqçi üçün mövsümə məğlubiyyətlə başlamaq asan deyil. Amma mən belə tez təslim olanlardan deyiləm. Gələcəyə ümidlə baxıram. Çünki bu oyunçuların potensialını bilirəm. Fanatlarımıza söz verirəm ki, gələn oyunda tam fərqli “Spartak” izləyəcəklər”.
Digər xəbərlər
