Premyer-liqaya dönən “Şamaxı” rəqabətədavamlı komandaya çevrilmək yönündə addımlar atmaqdadı. Yeni baş məşqçi Ayxan Abbasov heyəti formalaşdırarkən istər-istəməz çoxdan tanıdığı futbolçulara üstünlük verir. Belə futbolçulardan biri də Belajdi Pusidi. Ayxan bəy “Turan Tovuz”da sərəncamında olan albaniyalı hücumçunu yenə yanında görmək istəyir.

"Football-plus.az" Pusi ilə söhbətdə bəzi suallara cavab tapmağa çalışdı.

- “Şamaxı”nın yay hazırlığı necə gedir?
- Hər şey yaxşıdı. Hər gün daha yaxşı formadayıq. İndi fiziki məşqlərin sonundayıq və məşqçi daha çox taktika üzərində işləməyə başlayıb. Şamaxının havasını bəyənirəm, mövsümə qədər olan vaxt üçün idealdı.

- “Pelikan”la yoldaşlıq görüşündə fərqlənməyi bacardın. Növbəti mövsüm səni əsas heyət üzvü kimi görə biləcəyikmi?
- Təbii ki, hər oyunda əlimdən gələni edəcəyəm. Komandada yaxşı oyunçularımız var və hər kəs vacibdi. İnşallah, birlikdə yaxşı işlər görməyə hazırlaşırıq.

- Komanda yeni qurulur. Uyğunlaşa bilmisənmi, hansı çətinliklərlə qarşılaşdın?
- Gündən-günə bir-birimizə uyğunlaşırıq. İlk həftə bura gələndə yaxşı mənada təəccübləndim. İndi əsas işimiz yaxşı futbol oynamaqdı.

- Bilirik ki, komandaya Ayxan Abbasovun istəyi ilə gəlmisən. Amma “Turan Tovuz”la “Şamaxı” fərqli komandalardı. Onları necə müqayisə edərdin?
- Tovuzlular mənə yaxşı münasibət bəsləyirlər. Orda insanlar gözəldi və futbolu sevirlər. Amma bu futboldu, bəzən yeni macəralara başlamaq məcburiyyətində qalırsan. Düşünürəm ki, “Şamaxı” ilə müqavilə imzalamaqla düzgün qərar vermişəm.

- Şamaxının təbiəti ilə tanış olubsanmı?
- Düzünü desəm, kənara çıxmaq və təbiəti görmək üçün vaxtım azdı. Çünki biz mövsümə hazırlaşırıq. Lakin mövsüm uzundu və hər şeyə vaxtım olacaq.

- Artıq bir ildən çoxdu Azərbaycandasan. Bu müddətdə sənin üçün yaddaqalan və unudulmaz hadisələr varmı?
- Azərbaycanla bağlı gözəl xatirələrim var. Azarkeşlər xorla adımı səsləndirəndə vurduğum bütün qollardan və ötürmələrdən həzz aldım. Amma son dəqiqələrdə uduzduğumuz “Neftçi” ilə kubok oyununda üzüldüm.

- Azərbaycanlı futbolçulardan kimi bəyənirsən?
- Mən peşəkar olan və məqsədlərinə çatmaq üçün çox çalışan bütün oyunçuların pərəstişkarıyam.

- Azərbaycan mətbəxi ilə aran necədi?
- Azərbaycan mətbəxini Albaniya mətbəxinə bənzədirəm. Ona görə də hər şey zövqümə uyğundu.

- Göründüyü kimi, premyer-liqada həm yerli, həm də əcnəbi məşqçilər var.
- Düşünürəm ki, Azərbaycan məşqçiləri çox yaxşıdı. Çünki onların komandalarının necə futbol oynadığını görürəm. Məncə, Ayxan müəllim məşqçi kimi ən yaxşılardan biridi. Oyunçular ondan hər gün çox şey öyrənə bilər və büdcəsi az olan komandalarla yaxşı işlər görə bilər. Bu isə heç də asan deyil.

- Ötən mövsüm hakimlikdən şikayətlənənlər çox idi. Sən də onların sırasındasan?
- Şikayətlərin olması, hakimlərin səhv etməsi normaldı. Amma bəzən daha yaxşı qərarlar verə bilirlər.

- Deyilənə görə, sənə xarici klublardan təklif gəlib, amma rədd etmisən. Azərbaycanı seçməyində əsas amil nə oldu?
- Düzünü desəm, bu yay mənə çoxlu təklif gəldi. Lakin burda qalmağı seçdim. Çünki bu ölkədə özümü yaxşı hiss edirəm və bu mənim üçün vacibdi. Futbolun səviyyəsi yaxşıdı, hər şey qaydasındadı.

- Bilirsən ki, komandaların əksəri yeni mövsümə ciddi hazırlaşır. Premyer-liqada “Qarabağ”la başabaş mübarizə apara biləcək rəqiblər varmı?
- İndi “Qarabağ”la rəqabət aparmaq asan deyil. Bu mövsüm heç bir komandanın çempion yolunda onlarla yarışacağını düşünmürəm.

- Avropada Azərbaycanı “Qarabağ”la yanaşı, “Zirə”, “Sabah” və “Sumqayıt” da təmsil edir. Bu komandaların şanslarını necə dəyərləndirirsən?
- Avrokubok oyunları fərqlidi, orda ağıllı oynamaq lazımdı. Bütün Azərbaycan komandalarının rəqiblərini məğlub etmək keyfiyyəti var. Onlara uğurlar arzulayıram!

RÖYANƏ OĞUZ