Millimizin üzvü Mahir Emrelinin karyerasıyla bağlı durum hələ də qeyri-müəyyəndi. Onun "Dinamo"dan ayrılacağı bəllidisə, yeni klubu haqda müxtəlif iddialar mövcuddu. Hücumçunun gah Əlcəzair təmsilçiləriylə, gah "Qarabağ"da, gah da Almaniyanın 2-ci bundesliqa iştirakçısı "Nürnberq"lə danışıqlar apardığı deyilir.

"Football-plus.az"ın məlumatına görə, "zagreb.info" mövzuyla bağlı əldə etdiyi bilgini oxuyucularıyla bölüşüb.

Xorvatiya nəşrinin xəbərinə inansaq, Mahirin xidmətində israrlı görünən klub "Qarabağ"dı. Futbolçu uğrunda mübarizə aparan "köhlən atlar" onun azad agent statusu alaraq komandaya qoşulması üçün əlindən gələni edir. Emrelinin xorvatiyalılarla müqaviləsinə xitam verilməməsinin yeganə səbəbi isə maliyyə ilə bağlıdı. "Dinamo" hücumçunun xidmətində bir neçə klubun maraqlı olmasından istifadə etmək, pul qazanmaq niyyəti güdür.

"Nürnberq" tərəfi isə bu həftənin bazar ertəsi Mahiri bazaya dəvət edib müzakirələr aparsa da, yekun qərarını açıqlamayıb.

KƏNAN BAHADIR