İyulun 16-da ''Santyaqo Bernabeu''nun dolu tribunaları önündə rəsmi olaraq ''Real''ın yeni futbolçusuna çevrilən Kilian Mbappe ilə bağlı önəmli bir məsələyə aydınlıq gəlib.

Məlum olduğu kimi fransalı superulduzun son Avropa Çempionatında burnu qırılmışdı. O, qrup mərhələsinin ilk turunda Avstriya ilə oyunun son anlarında qanlar içində meydanı tərk etmiş və turnirin qalan matçlarında qoruyucu maska ilə oynamaq məcburiyyətində qalmışdı. ''Real''ın həkimləri Mbappenin burnunun durumunu ətraflı müayinə ediblər.

''Kral klubu''nun tibbi personalı belə qərara gəlib ki, 25 yaşlı futbolçunun əməliyyata ehtiyacı yoxdu. Amma Mbappenin yenə maskada oynamağa davam edib-etməyəcəyi bilinmir. Rəhbərlik tərəfindən AÇ-də yarımfinala qədər irəliləyən Mbappeyə avqustun 8-nə qədər istirahət hüququ verilib. Amma onun tətilin daha erkən başa vuraraq məşqlərə qoşulacağı gözlənilir.

İspaniya mətbuatının yazdığına görə Mbappe komandanın ABŞ turnesində iştirak etmək istəyir. Amma bəzi mənbələr iddia edir ki, məşhur futbolçu ABŞ turnesini buraxacaq.

ƏLİ