“Türkiyə futbolunda türkdilli ölkələrin futbolçularından ən azı birinin yerli oyunçu statusunu almasına hər birimiz çox sevindik. Xüsusən də azarkeşlər. Yəni ən azı Türkiyədə çıxış etməklə superliqaya çıxış imkanı əldə edə bilərdilər. Amma gözləntilər doğrulmadı. Bunun bir tərəfi maliyyə ilə bağlıdı. Yəni Türkiyə klublarında, hətta superliqa təmsilçilərində belə ötən mövsüm maliyyə problemi qabardı. Məsələn, Şahruddin Məhəmmədəliyevin “Adana Dəmirspor”dan ayrılmasının səbəblərindən biri də bu idi. Aylardı maaş ala bilmirdi. 1-ci liqada isə futbolçularımız oyun baxımından bəzi məqamlarda ön plana çıxsa da, bəzi məqamlarda oynaya bilməmələrinin səbəbi mental hazırlığın istənilən səviyyədə olmamasıydı. Məhz bu təcrübəsizlik sözünü deyir. Yəni futbolçularımız ehtiyat oyunçular skamyasında əyləşdikdə artıq bədbinliyə qapılırdı. Əsas məsələ isə Azərbaycan klublarının davamlı şəkildə həmin futbolçulara “elçi düşməsiylə” bağlıdı. Ramil Şeydayev nümunəsini götürək. Şeydayev “Kocaelispor”da əsas heyətin daimi üzvünə çevrilə bilmədi. Orda da klub daxilində böhran var idi. Bu məqam da təsir göstərdi. Ancaq əsas məsələ yerli klublarımızın həmin futbolçulara “elçi düşməyidi”. Məsələn, “Neftçi” illik 550 min dollarlıq məvacib təklif etdi və Ramil bunu qəbul etdi. Şeydayev də elə düşünür ki, oturmuşam Azərbaycanda, evimdə və ildə 550 min dollar maaş alıramsa, daha Türkiyədə 250 min dollara oynamaq nəyimə lazımdı? Yəni avtomatik futbolçunun beyni bura fokuslanır. Həmçinin eyni durum bugünlərdə “Qarabağ”a transferi açıqlanacaq Şahruddinə də aiddi. Eyni zamanda, yerli futbolçuların yetişməsində ciddi problemlər olduğu da ön plana çıxır. Bu məsələ də klublarımızın adına mənfi hal kimi qiymətləndirilməlidi. Bir sözlə, həm futbolçularımızda, həm də klublarımızda günah var. Akademiyalar zəif olduğuna görə müəyyən yaş dövründə almadığı tədrisin, psixoloji tərbiyənin daha sonrakı illərdə ortaya çıxardığı problemlərdi. O da oyunçunun mental baxımdan özünü çempionata verməməsində, uyğunlaşmamasında göstərir. Bütün bunların da məntiqi nəticəsi odu ki, futbolçularımız rəqabətə davam gətirə bilmir”.