Xəbər verdiyimiz kimi, “Formula-1” üzrə dünya çempionatında Silverstoun mərhələsi “Mersedes”in pilotu Lüis Hemiltonun qələbəsi ilə başa çatdı.

Britaniyalı pilot həmkarlarımızın bəzi suallarını cavablayıb.

- Lüis, bu qələbəni sənin üçün xüsusi edən nədi?
- Yəqin ki, çoxdan qələbə qazanmamağım. İndicə kimsə dedi ki, son qələbəmdən 946 gün keçmişdi. Uzun fasilədi. Komanda ilə birgə çox çətin dönəmdən keçdik, maşınla bağlı problem üzündən son illərdə çempionluq yarışında iştirak edə bilmədik. Komandada hər kəsə bununla mübarizə aparmaq psixoloji cəhətdən çətin idi. Ancaq mümkün olan hər şeyi etdik, özümüzü tam işə həsr etdik. Komandanı mövsümün sonunda tərk edəcəyimi elan edəndən sonra emosiyalar bir qədər də artdı. Öz aramızda düşünürdük ki, yenidən qələbələr uğrunda mübarizə aparmağa qadir olmayan maşınla mövsümə başlayırıq. Hər halda, azarkeşlərimiz önündə, ev “Qran-pri”sində qələbə qazanmağı bacardıq. Podiumun ən yüksək pilləsində dayanıb himn dinləmək qeyri-adi hissdi. Bütün ailəm də burdaydı.

- Son dövrədə azarkeşlərin qışqırıqlarını eşidirdinmi?
- Maşın azarkeşlərin səsini batırır, ancaq onların dəstəyini görür, hiss edirdim. Bezdirici 7-ci və ya 15-ci döngədə insan kütləsini görürsən. Silverstoun mənim üçün dünyanın ən yaxşı trassıdı.

- “Mersedes” ardıcıl ikinci mərhələdə qələbə qazandı. Mövsümün qalan hissəsi üçün bu nə deməkdi?
- Bütün komandaya çox-çox təşəkkür edirəm. Bu, nəticəsizliyə baxmayaraq, yorulmadan işə davam edənlər önündə şlyapamı çıxarmaq üçün daha bir səbəbdi. Corc Rassellin ötən həftədəki qələbəsi möhtəşəm idi, ancaq sırf sürətə əsaslanmamışdı. Bu həftə isə ilk dəfə məhz sürət hesabına qələbə qazandıq.

- Bu qələbə iyulun 21-də keçiriləcək Macarıstan mərhələsi ərəfəsində nikbinlik üçüm əsas verirmi?
- Bilirsizmi, mən Macarıstanı sevirəm. Odu ki, səbirsizliklə bu mərhələni gözləyirəm. Maşın canlanmağa başlayır, yenidən qələbə uğrunda mübarizə apara biləcəyimə görə sevinirəm.

- Gələn il “Ferrari”yə keçidi necə səbirsizliklə gözlədiyini bilirik. Yenicə azarkeşləriniz önündə qələbə qazananandan sonra komanda ilə vidalaşmaq kədərli deyilmi?
- Mövsümün əvvəlində maşınımız sürətdə “Red Bull”a ciddi şəkildə uduzurdu. Yarışlarda qələbə qazana biləcəyimizi heç düşünmürdük də. Toparlanmağımız, birlikdə maşını daha rahat vəziyyətə gətirməyimiz hər birimizə qürurlanmaq üçün əsas verir. Mənim zirzəmidə yox, zirvədə getməyim yaxşıdı. İrəlidə “Mersedes”i uzun yol gözləyir. İndi maşınımız ən sürətli deyil, ancaq buna yaxınıq. Ümid edirəm ki, bəzi yenilənmələrdən sonra sabit şəkildə liderlik uğrunda mübarizə apara bilərk.