"Bütün ssenarilərə uyğun hazırlıq görmüşük" - Yuri Qura

Bu gün Avropa Liqasının 1-ci təsnifat mərhələsinin "Zirə" - "Şerif" matçı ilə bağlı mətbuat konfransı keçirilib.

"Football-plus.az"ın məlumatına görə, "arılar"ın baş məşqçisi Yuri Qura jurnalistlərin suallarını cavablayıb.

- İlk oyunda heyətdə moldovalı futbolçu yox idi. Səbəb nədi?
- Komandada yerli oyunçular var. Matçın statusu fərqli olduğundan əcnəbi oyunçulara şans verdik.

- Bakı həm də çimərlik şəhəridi. Futbolçularınızı dənizə aparmaq fikriniz var?
- Xeyr. Moldovada da istidi.

- Əyyub Allaşdan Azərbaycan və ya "Zirə" haqda soruşmuşduz?
- Bəli, o, Azərbaycan futbolu haqda məlumat verib. "Zirə"ylə bağlı standart vəziyyətlərdəki davranışlarından danışıb.

- "Zirə"ylə oynayacağınızı biləndə ilk oyunda evdə belə nəticəylə qarşılaşacağınızı düşünürdüz?
- Deməzdim ki, "Zirə"dən qorxmuşduq. Sabah da oyun var. Nəticəni lehimizə dəyişməyə çalışacağıq.

- İlk oyunda uduzmağınıza baxmayaraq, favorit göstərilirsiz. Bu, komandaya necə təsir göstərir?
- Komandaya heç bir təsir etmir. Biri var ki, favorit sayılmaq, biri də var meydanda sübut etmək...

- Üç il öncə səfərdə "Real"ı məğlub edən komanda "Zirə"ni keçə bilməsə, belə hal klubda və Moldovada necə qarşılanacaq?
- "Zirə"dən güclü olduğumuzu göstərmək istəyirik. Bunu sübut etmək niyyətindəyik.

- İlk oyundakı məğlubiyyətdən sonra klub rəhbərliyi sizə "sonuncu oyundu" dedi?
- Belə söhbət olmadı. Amma hər məşqçi və klub prezidenti qələbə qazanmaq istəyir.

- Rəşad Sadıqovu tanıyırdız? O, "Qarabağ"ın heyətində futbolçu kimi "Şerif"ə qarşı oynayıb...
- Bəli, çox yaxşı tanıyırıq. Köməkçim onunla Türkiyədə oynayıb. Ondan da kifayət qədər məlumat əldə etmişik. Püşk bəlli olandan sonra dərhal ilk işimiz rəqibi və baş məşqçini analiz etmək olub.

- Həmyerliniz Roman Qriqorçuk "Neftçi"yə baş məşqçi təyin edildi. O, Azərbaycan futboluna bələddi. Qriqorçukdan "Zirə" haqda məlumat almısız?
- Xeyr. O, artıq "Neftçi"yə keçib. Hazırlıqla məşğul idilər deyə, narahat etmək istəmədim.

- Bakıya ilk səfərinizdi? Azərbaycanda işləmək variantınız olub?
- İlk gəlişimdi. 2001-ci ildə Qazaxıstanda, "Aktau"da oynayanda, Bakıya o tərəfdən baxırdım.

- Penaltilər seriyasına hazırlaşacaqsız?
- Bütün ssenarilərə uyğun hazırlıq görmüşük.

KƏNAN BAHADIR