"AFFA müvafiq məsələlər üçün ödəniləcək məbləğdə dəyişiklik edəcək" - YENİLİK
AFFA İcraiyyə Komitəsinin dünən keçirilən iclasında verilən qərarlardan biri diqqəti cəlb etdi.
Belə ki, qurum klublara ayrılan vəsaitin meyarlar üzrə bölgüsünün müzakirə olunduğunu və baş verən dəyişikliklərlə bağlı klublara məlumat verilməsinin qərara alındığını açıqladı.
Mövzu haqda daha ətraflı məlumat əldə etmək məqsədilə AFFA-nın Mətbuat və İctimaiyyətlə Əlaqələr Departamentinin rəhbəri Elnur Məmmədliyə müraciət etdik. Onun "Football-plus.az"a dedikləri:
"Burda klublara ayrılan maliyyənin azaldılmasından və ya artırılmasından söhbət getmir. Ümumiyyətlə, vəsaitin miqdarında dəyişiklik olmayacaq. Bilindiyi kimi, yardım müəyyən meyarlar üzrə edilir. Sadəcə, müvafiq məsələlər üçün ödəniləcək məbləğdə dəyişiklik olacaq. Yəni hansısa sahə üzrə xərclənilməsi nəzərdə tutulan məbləğ azala və ya arta bilər".
Xatırladaq ki, AFFA premyer-liqa klublarına ildə 3 milyon, 1-ci liqa iştirakçılarına 300 min, 2-ci liqa təmsilçilərinə isə 50 min manat məbləğində yardım edir.
KƏNAN BAHADIR
Digər xəbərlər
