Fransa yığması Portuqaliyanı penaltilər hesabına mübarizədən kənarlaşdırmaqla yarımfinala adladı.

Ancaq “üçrənglilər”in turnirdəki oyunu heç kimin ürəyincə deyil. Xüsusən də komandanın kapitanı Kilian Mbappe çox sönük təsir bağışlayır.
“Real”ın 25 yaşlı hücumçusu Avropa çempionatına gələrkən bəlli idi ki, bu, onun qol hesabını açmadığını yeganə böyük turnirdi. Mbappe Polşa ilə oyunda penaltidən fərqlənməklə bu boşluğu aradan qaldırdı. Ancaq Kilian bununla da kifayətləndi, ənənəvi oyun səviyyəsinə qətiyyən yaxın düşə bilmir.

Fransada belə enişə izah tapıblar. Yerli “Le Parisien” nəşri belə hesab edir ki, Kilian iki əsas səbəbdən pis formadadı – zədədən əziyyət çəkir və psixoloji planda özünü rahat hiss etmir. Mbappe Avropa çempionatının elə ilk turunda – Avstriya ilə oyunda ciddi zədə aldı. Ulduz hücumçu hava mübarizəsi zamanı Kevin Danso ilə toqquşdu. Sonradan onun burnunun sındığı bilindi. Kilianın hətta bütün turniri buraxmaq təhlükəsi var idi. Ancaq müəyyən mənada bəxti gətirdi. Onun üçün xüsusi maska düzəltdilər, yalnız bir oyun buraxandan sonra 3-cü turda meydana qayıtdı.

Maska, yumşaq desək, xoşagəlməz şeydi. Portuqaliya ilə oyundan sonra keçirilən mətbuat konfransında Kolo Muani onun haqqında belə dedi: “Mən maskanı taxmağa çalışdım. Onu taxarkən nəyisə görmək mümkün deyil”. Ancaq sınıq burundan başqa Mbappeni kürəyindəki ağrılar və zədəli dizi də narahat edir.

Psixoloji problemlər məsələsi daha maraqlıdı. “Le Parisien” iddia edir ki, Mbappe PSJ ilə münaqişəyə görə əsəb gərginliyi yaşayır. Paytaxt klubunu ötən mövsümün sonunda tərk edən Kilian “Real”a azad agent kimi qoşuldu. Parislilər bu addımın cavabında forvarda maaşın bir hissəsini və loyallığa görə bonusu ödəməkdən boyun qaçırdılar, bu üzdən tərəflər arasında münaqişə yarandı. Çox güman, münasibətləri məhkəmədə aydınlaşdırmalı olacaqlar.
Mbappeni stressə salan səbəblərdən biri də Fransadakı parlament seçkisidi. Ulduz futbolçu siyasətlə ciddi şəkildə maraqlanır. Məsələn, onun yığmadakı komanda yoldaşı Markus Türam mediaya belə açıqlama vermişdi ki, ultrasağçı Marin Le Penin “Milli birlik” hərəkatının qələbəsinə imkan verməmək üçün seçki məntəqəsinə getmək və səs vermək lazımdı, Mbappe də onu dəstəkləmişdi.

Seçkinin ilk turu yekunlaşandan sonra aydın oldu ki, “Milli birlik” qalan siyasi qüvvələrdən daha çox – 33,4 faiz səs toplayıb. Mbappe bu nəticəni “fəlakət” adlandırmaqla yanaşı, bildirdi ki, həmişəkindən daha fəal şəkildə seçliyə qatılmaq lazımdı. Kilianın dəstəklədiyi siyasi qüvvə isə Fransa prezidenti Emmanuel Makronun ətrafında yaranan “Birlikdə” koalisiyasıdı.

Artıq seçkinin ikinci turu da arxada qalıb. Dünya mediası Makron ilə 2-ci yeri tutan solçu “Yeni Milli Cəbhə” arasındakı sövdələşmədən yazır. Yəni bu iki siyasi qüvvənin namizədləri seçkidə biri o birinin xeyrinə namizədlikdən imtina edəcək ki, Marin Le Pen səslərin əksəriyyətini toplaya bilməsin. Bu plan çox yaxşı işlədi. Seçkinin iyulun 7-də keçirilən 2-ci turundan “Yeni Milli Cəbhə” qalib ayrıldı. Makronun koaloisiyası 2-ci, Le Penin partiyası 3-cü oldu. Bu isə o deməkdi ki, Mbappe artıq ölkəsinin gələcəyinə görə narahatlığı bitirib, özünün və yığmanın gələcəyini düşünməlidi.