“Bəzi məsələlərlə bağlı vətənə dönməliydim” - Bəxtiyar buna görə “Araz-Naxçıvan”ı seçib
Bilindiyi kimi “Tuzlaspor”dan ayrılan Bəxtiyar Həsənalızadə premyer-liqa klubu “Araz-Naxçıvan”la anlaşıb.
“Football-plus.az” olaraq, millimizin müdafiəçisinin seçimini nə üçün Muxtar Respublika təmsilçisindən yana etdiyini öyrənmək istədik. Çünki 31 yaşlı müdafiəçi razılıq əldə etməzdən öncə Azərbaycandan, həmçinin Türkiyədən də bir sıra təkliflər olduğunu bildirmişdi. Oyunçu seçimini belə izah etdi:
“Başqa təkliflərim də var idi. Amma seçimim “Araz-Naxçıvan”dan tərəf oldu. Ölkədəki klubların adını çəkmək istəmirəm. Türkiyəyə gəlincə, orda transferlər yeni başlayırdı. Menecerlər müraciət etmişdilər ki, məni ordakı klublara təklif etsinlər. Həmçinin İrandan da bir menecer bu barədə müraciət etmişdi. Sadəcə, özüm bəzi məsələlərlə bağlı vətənə dönməliydim. Bu üzdən də ölkədən bir klub seçməliydim. Bir neçə komandadan təkliflər də oldu. “Araz-Naxçıvan” daha istəkli olduğuna görə buranı seçdim”.
Yeri gəlmişkən, futbolçunun “Tuzlaspor”la müqaviləyə vaxtından əvvəl xitam verdiyinə görə klubla problemlər yaşadığı, hətta son bir neçə ayın maaşını ala bilmədiyi deyilirdi. Bəxtiyar bu mövzunu belə şərh etdi:
“Maaşla bağlı problem hələ ki qalır. Bu proses uzun çəkəcək. Şikayət olunub, məhkəmə prosesi gedəcək”.
KAMAL SƏFƏR
Digər xəbərlər
