“Müntəzəm uşaq futboluna gedir, oyunları izləyirəm. Hərdən xətt üzərində qaçmağı bacarmayan hakimlər görürəm. Meydançada az qala bir komandaya azarkeşlik edən səviyyədə olanı da var. Bəziləri heç hakimliyin qapısından keçməli deyil. Hazırda oğlum Tovuz akademiyasında oynayır. Klub futbolçunun yetişməsi üçün hər bir şəraiti yaradır. Fikrimcə, oyunçular nə qədər səviyyəli olsa, hakimlərin də səviyyəsi bir o qədər artar. Əcnəbiləri gətirmək əvəzinə özümüzdə olan yaxşı mütəxəssislərə şans verilsə, yaxşı olar. Özümüzə inanmayıb qıraqdakına inanacağıq? Avropada nə qədər" Qarabağ"a qarşı qərəz gördük? Onlar da əcnəbi hakimlərdi. Yəni səhv edə bilirlər. Bəzən uşaq futbolunda belə tərəfkeşlik edənlər olur. Amma bir-iki nəfərə görə öz hakimlərimizi pisləməyək. Buna görə çox təlim keçilsə, yaxşı olar. Praktika olmalıdı. Yetərincə işçi qüvvəmiz, savadlı kadrlarımız var. Tofiq Bəhramov kimi hakim yetişdirən ölkə niyə kənardan mütəxəssis gətirsin axı? Düşünürəm ki, hakimlər ilk növbədə uşaq futbolunda səhvlərin üzərində işləməli, inkişaf etməlidi. Onlara nəzarət də güclənsə, yaxşı olar. Bəzi kadrlar bizdə yoxdu, o zaman əcnəbini çağırmaq normaldı. Məsələn, "Sumqayıt"ın uşaq akademiyasının rəhbəri deyir ki, videoanalitik yoxdu. Məcbur bu sahə üzrə mütəxəssis xaricdən gəlməlidi. Zamanla onlar da yetişdirilməlidi”.