“Qarabağ”dan başqa avrokuboklara qatılacaq digər üç komandanın kimliyi çox gec, yəni faktiki sonuncu turda bilindiyinə, bu da onların planlarına təsir etdiyinə görə transfer çalışmalarına gec başladıqlarını görürük. Növbəti mövsüm üçün hazırlığa premyer-liqaya yenidən qayıdan “Şamaxı” və hədəfi həmişə yuxarılarda olan “Araz-Naxçıvan” daha aktiv başlayıb. Artıq “qırmızı-ağlar” ikinci mövsümdə elitada möhkəmlənmək üçün transfer bazarındakı yerli oyunçuları komandaya cəlb etməklə məşğuldular. Bunun üçün yaxşı maliyyələri də var. Prinsipcə həmişə belə olub: ilk növbədə yerli futbolçulara, daha sonra əcnəbilərə baxılır. Əcnəbi futbolçuları da daha çox yay təlim-məşq toplanışlarında görmək və ordakı yoxlama qarşılaşmalarında onların potensialını sınamaq təcrübəsindən istifadə olunur. “Qarabağ” martdan bəri çempionluğu təmin etdiyi üçün hazırda kifayət qədər maraqlı transferlər edir. Məsələn, Musa Qurbanlının yenidən komandaya qaytarılması, yeni qapıçı Fabiyan Buntiçin transferini deyə bilərik. Yəqin ki, digər hücum mövqelərində də oyunçulara ehtiyac olacaq. Hətta bildiyim qədəriylə Ağdam təmsilçisi təkcə bu yox, əvvəlki “transfer pəncərəsi”ndən etibarən futbolçuları izləməyə başlayır, həm də yalnız fasilə zamanı yox, həmişə yeni oyunçu axtarışındadı. Əslində belə də olmalıdı. Əməkdaşlıq etdiyimiz klublar deyəndə ki, bizim Elcan Həsənliylə birlikdə ikinci hazırlıq kursumuz oldu və hazırda 7 FİFA agentimiz olduğu üçün onların da hər biri bazarda müxtəlif klublarla işləyir. Özüm daha çox skautinqlə məşğulam və bəzi hallarda klublara, bəzi hallarda agentlərə oyunçular təklif edirəm. Hazırda Rusiya bazarından Azərbaycan klublarına böyük maraq var. Yəni burdan oyunçu almaq yox, gəlib burda çıxış etmək baxımından tələbat yüksəkdi. Yerli oyunçular var, hansı ki, ölkə xaricinə getmək istəyirlər. Yaxud da gənc, istedadlı futbolçularımız var ki, klublarını dəyişmək istəyirlər. Düşünürəm ki, iyulun əvvəlində transfer bazarı daha da qızışacaq. Şəxsi mövqeyim həmişə belə olub ki, “transfer pəncərəsi”nin bağlanmasına bir neçə həftə qalmış, çempionatın 1-2 turundan sonra oyunçunun potensialını görüb, son dəqiqə transferi etməyə çalışırlar. Artıq həmin ərəfədə ya aşağı qiymətə çox keyfiyyətli, ya da sadəcə bəxtəbəxt futbolçular qalır. Ümumi götürdükdə, təbii ki, hamı ölkə çempionatında keyfiyyətli əcnəbi futbolçuların olmasını istəyər. Düşünürəm ki, Peşəkar Futbol Liqası bu yöndə bir addım ata bilər. Ən azı ölkə xaricində çıxış edən Azərbaycan əsilli futbolçular var ki, onlara müəyyən güzəşt edə bilərik. Türkiyə azərbaycanlı futbolçuları legioner saymadığı kimi, biz də belə istisnalar edə bilərik. Bunun nəticəsində də kifayət qədər istedadlı Azərbaycan əsilli əcnəbi oyunçuları ölkə futboluna qazandıra bilərik”.