AÇ-2024-ün 1/8 finalında Sloveniya ilə qarşılaşma həm Portuqaliya, həm də Kriştiano Ronaldo üçün dramatik alındı.

Ünlü superulduz qolsuz başa çatan qarşılaşmanın əlavə vaxtında penaltidən yararlana bilmədi. Slovenlərin təcrübəli qapıçısı Yan Oblak onun zərbəsini dəf etdi.

Düzdü, oyunsonrası penaltilər seriyası portuqaliyalılar üçün uğurlu alındı. Topa ən birinci məhz Kriştiano yaxınlaşdı və zərbəni dəqiq yerinə yetirdi. Portuqaliyanın qapıçısı Dioqu Koşta isə sloveniyalıların hər üç penaltisini dəf etməklə inanılmaz bir performans sərgilədi. O, AÇ tarixində oyunsonrası penaltilər seriyasında qol buraxmayan ilk qapıçı oldu! Kriştiano isə AÇ-nin antirekordçusu oldu. O final mərhələsində iki dəfə penaltini boşa verən ilk futbolçu kimi turnirin tarixinə düşdü.

Ronaldo daha öncə AÇ-2016-da Avstriya ilə oyunda da penaltini boşa vermişdi. Həmin vaxt onun zərbəsi tirə tuş gəlmişdi. 39 yaşlı futbolçu dünənki qarşılaşmanın ardından qeyd etdi ki, bu, onun karyerasının sonuncu Avropa Çempionatıdı.

ƏLİ