İngiltərə praqmatik futbola sadiq qaldı - REPORTAJ

22.06.2024 22:08 296
Dünya futbolu
C qrupu
N 7. Serbiya – İngiltərə 0:1 (0:1)

1. Predraq Raykoviç
2. Strahinya Pavloviç
4. Nikola Milenkoviç
13. Miloş Velkoviç
11. Filip Kostiç
(25. Filip Mladenoviç, 43)
22. Saşa Lukiç
(8. Luka Yoviç, 61)
6. Nemanya Qudel
(17. İvan İliç, 46)
20. Sergey Milinkoviç-Saviç
14. Andriya Jivkoviç
(26. Velko Birmançeviç, 74)
7. Duşan Vlahoviç
9. Aleksandar Mitroviç (k)
(10. Duşan Tadiç, 61)
Ehtiyat oyunçular
12. Corce Petroviç
23. Vanya Milinkoviç-Saviç
3. Nemanya Stoyiç
5. Nemanya Maksimoviç
15. Srcan Babiç
16. Srcan Miyailoviç
18. Petar Ratkov
19. Lazar Samarciç
21. Miyat Qaçinoviç
24. Uroş Spayiç
Baş məşqçi: Draqan Stoykoviç

1. Cordan Pikford
12. Kiran Trippyer
6. Mark Qehi
5. Con Stounz
2. Kayl Uoker
4. Deklan Rays
8. Trent Aleksander-Arnold
(16. Konor Qallaher, 69)
11. Filip Foden
10. Cud Bellingem
(26. Kobbi Maynu, 86)
7. Bukayo Saka
(20. Carrod Bouen, 76)
9. Harri Keyn (k)
Ehtiyat oyunçular
13. Aaron Ramsdeyl
23. Din Henderson
3. Lük Şou
14. Ezri Konsa
15. Lüis Dank
17. Ayven Touni
18. Entoni Qordon
19. Olli Uotkins
21. Ebereçi Eze
22. Co Qomes
24. Koul Palmer
25. Adam Uorton
Baş məşqçi: Qaret Sautqeyt

Qol: C.Bellingem, 13.
Vərəqələr: N.Qudel, 39. D.Tadiç, 75. D.Stoykoviç, 83 – sarı.
Hakimlər: DANİELE ORSATO, Çiro Karbone, Alessandro Callatini (hamısı İtaliya).
VAR hakimləri: Massimiliano İrrati, Paolo Valeri (hər ikisi İtaliya), Ketelin Popa (Rumıniya).
16 iyun. Helzenkirhen. “Arena AufŞalke” stadionu. 48953 tamaşaçı (50000 yerlik).
Birinci hissəyə 2, ikinci hissəyə 4 dəqiqə əlavə olunub.
Oyunun ən yaxşısı: Cud Bellingem.

6 (1) qapıya (“çərçivə”yə) zərbə 5 (3)
19 qayda pozuntusu 8
2 künc zərbəsi 1
0 ofsayd 1
3 (0) sarı (qırmızı) vərəqə 0 (0)
47 topa sahibolma (faizlə) 53
512 (454) ötürmə (dəqiq) 600 (544)
124,7 məsafə (km) 127

İngiltərə və Serbiya millilərinin yarımmüdafiə ilə hücum xəttində əla futbolçulara sahib olması oyunun məhsuldar keçəcəyini düşünməyə əsas verə bilərdi. Amma “üç şir”in baş məşqçisi Sautqeytin növbəti dəfə praqmatik futbola güvənməsi belə gözləntiləri alt-üst etdi. Britaniyalılar tam ehtimal olunan start heyətiylə meydana çıxdılarsa, “ağ-qartallar”ın çalışdırıcısı Stoykoviçin Tadiçi ehtiyatda saxlaması diqqəti çəkdi. Yarımmüdafiəçinin özü də matçdan sonra bundan narazılıq etdi:

“Yığmanın lideri və kapitanıyam. Bu komandanın ən yaxşı futbolçusuyam və 90 dəqiqə oynamalıyam. İlk “11-lik”də başlasaydım, hər şey fərqli alınardı. Amma baş məşqçi cəmi 30 dəqiqə oynamağımı istəyirsə, qoy belə olsun”.

İngiltərə millisi hesabı erkən açdı: Bellingem Sakanın cinah asmasından sonra müdafiəçiyə də toxunan topu baş zərbəsiylə qapıya göndərdi. Cud bu oyunda həmçinin rekorda imza atdı. O, 21 yaşı tamam olmadan üç nəhəng turnirdə - AÇ-2020, DÇ-2022 və AÇ-2024-də meydana çıxan ilk avropalı kimi tarixə düşdü. Fasiləyə qədər yaxşı təsir bağışlayan adalılar bir neçə təhlükəli vəziyyət yaratmaqla yanaşı, az qala Mitroviçə qol hədiyyə edəcəkdilər. İkinci hissədə isə Sautqeytin komandası millilər səviyyəsində, bəlkə də hamıdan yaxşı bacardığı işi görməyə – hesaba görə oynamağa başladı. Düzdü, İngiltərə Keynin baş zərbəsindən sonra fərqi artırmağa yaxın oldu, amma Raykoviçin qurtarışı buna imkan vermədi. Serbiyanın oyunu isə Tadiçin meydana çıxması ilə xeyli canlandı. Buna baxmayaraq, futbolun yaradıcıları qələbə hesabını qoruya bildilər.

İngiltərə yığması Avropa çempionatının qrup mərhələsində ardıcıl 5 matçda qapısını toxunulmaz saxlayan ilk komanda oldu. “Üç şir” qitə birinciliyində cəmi 2-ci dəfə qələbə ilə başladı (5 heç-heçə, 4 məğlubiyyət). Britaniyalılar buna qədər yalnız bir dəfə - AÇ-2020-də turnirin birinci matçında qalib gəlmişdilər. Ümumiyyətlə, Sautqeytin təyinatından sonra İngiltərə bütün böyük turnirlərə qələbə ilə başlayıb. Adalılar DÇ-2018-də keçirdiyi ilk oyunda Tunisi (2:1), AÇ-2020-də Xorvatiyanı (1:0), DÇ-2022-də isə İranı (6:2) məğlub etmişdilər.