Bu gün 5 oktyabr – Beynəlxalq Müəllimlər Günüdü.

Hər sahədə olduğu kimi, idman sahəsində də çalışan şəxslərin sirlərini öyəndikləri, doğma bildikləri müəllimləri var. Azərbaycan idmanın bəzi tanınmış simaları “Football-plus.az” saytı vasitəsilə müəlimlərinə təbrik göndərdilər.

Əfran İsmayılov: “Mənə futbolun sirlərini ilk dəfə Rövşən Ələkbərov öyrədib. Üstümüzdə əziyyəti çoxdu. Ona təşəkkür edir, bayramını təbrik edirəm. Elçin Xudadatov da var. 16-17 yaşım olarkən “Qarabağ”ın ikinci komandasında onun rəhbərliyi altında çıxış elədim. Ağdam təsmilçisinin əsas heyətinə düşməyimdə də Elçin müəllimin böyük əməyi var. Hər iki müəllimimlə indi də əlaqə saxlayıram. Bayramlarını təbrik edirəm”.

Ruslan Abışov: “Mənə futbolun sirlərini Əli müəllim öyrədib. Sizin sayt vasitəsilə Əli, İsmayıl, Rüstəm, İbrahim və İslam müəllimi təbrik edirəm. Əziyyətiniz üçün çox sağ olun”.

Aynur Sofiyeva: “Müəllim haqda ən yaxşı cümləni Ulu Öndər Heydər Əliyev işlədib: “Mən müəllimdən yüksək ad tanımıram”. Doğrudan da, müəllim insanın həyatında ən önəmli şəxslərdəndi. Hansı ki uşaq olarkən əlimizdən tutaraq həyat yollarında bizimlə birgə addımlayır və maarifləndirir. Xoşbəxt insanam ki, ətrafımda gözəl müəllimlər olub. Daha sonra universitet zamanlarında da dəyərli müəllimlərim olub. Şahmat karyerama gəlincə, Aleksandr Aslanovu qeyd edərdim. 8 yaşımda olarkən Zərdabda qatıldığım turnirdə oyunumu bəyənmişdi. Daha sonra bu sahədə inkişafımda böyük rolu oldu. Təəssüf ki, tez dünyasını dəyişdi. Ruhu şad olsun. Qazandığım uğurlara görə ona həmişə borcluyam. Sonda bir əlavə etmək istəyirəm. Mənim anam da müəllim olub. Hazırda isə təqaüddədi. Onun timsalında bütün müəllimləri təbrik edirəm. Həmişə şagirdlərinin, tələbələrinin uğurları ilə fəxr etsinlər”.

Alla Həsənova: “İlk məşqçim 7 yaşımda Trofimova İnna Konstantinovna olub. 15 yaşım olanda isə Faiq müəllim məni əsas komandaya aparıb və 20 il məşqçim olub. Hazırda Faiq müəllim federasiyanın vitse-prezidentidi. Adını çəkdiyim, üzərimdə əziyyəti çox olan əziz müəllimlərimə təşəkkür edir, bayramlarını təbrik edirəm”.

Amil Həmzəyev: “Mənim Gəncədə ilk məşqçim Elçin Süleymanovdu. Bakıda isə vaxtilə üzərimdə böyük əməyi olan məşqçi Elxan Əliyevdi. Bu iki şəxsin karyeramın yaxşı olmasında böyük əməyi var. Hər ikisinin bayramını təbrik edirəm. Ümumiyyətlə, müəllimlik gözəl peşədi. Həmişə bunu demişəm. Bütün müəllimlərin bayramını təbrik edirəm”.

CAVİD ƏLİYEV