“Mançester Siti”nin azarkeşləri son çempionluğu hələ də bayram edirlər.

"Football-plus.az" xəbər verir ki, zarafat deyil, onların sevimli komandası premyer-liqada ardıcıl 4-cü dəfə ən güclü adını qazanmaqla yeni rekord müəyyənləşdirib. Doğrudu, bu uğurların memarı sayılan Xosep Qvardiolanın bir ildən sonra baş məşqçi vəzifəsini tərk etmək ehtimalının yüksək olması narahatlıq doğurur. Əhvalı bir qədər korlayan digər məsələ isə yerli futbol qurumunun kluba maliyyə fəaliyyəti ilə bağlı çox sayda ittiham irəli sürməsidi. “Siti”nin direktorlar şurasının sədri Xaldun Əl-Mübarək klubun rəsmi saytına müsahibəsində bu məsələlərlə bağlı sualları cavablayıb.

Ardıcıl dörd çempionluq...
Son iki mövsüm bizə bir il kimi göründü, sanki bir-birinə sarıldılar. Mövsümə hazırlıq prosesi çox qısa keçdi və dərhal rəsmi oyunlara başlamalı olduq. Əvvəlcə İngiltərə Superkuboku, sonra Avropa Superkuboku matçına çıxdıq, sonra isə premyer-liqada növbəti mübarizəyə start verdik. Və mövsümün sonunda ardıcıl 4-cü dəfə premyer-liqanın qalibi olduq.

Hərdən fasilə vermək və vəziyyəti təhlil etmək lazımdı. İngiltərə çempionatında 1926-cı ildən sonra 5 komanda ardıcıl 4 dəfə çempion olmağa cəhd edib. 5 komanda. 80-ci illərdə “Haddersfild”, sonra “Arsenal” və “Liverpul”, daha sonra isə “Mançester Yunayted” çempionluq seriyasını 4-ə çatdırmağa çalışıb. Özü də “Yunayted” buna iki dəfə cəhd edib. Amma bu komandaların heç biri istəyinə çata bilməyib. İngiltərə futbolunun mövcud olduğu 100 ildən artıq müddətdə heç bir komanda ardıcıl 4 dəfə çempion ola bilməyib. Bunu düşünərkən uğurumuzun miqyasını ən real şəkildə dəyərləndirməyə başlayırsan. Bunun nə dərəcədə çətin vəzifə olduğunu, hədəfə çatmaq üçün gərgin mübarizəyə nə qədər enerji sərf etdiyini anlayırsan...

...çempionluq seriyasını 5-ə çatdırmaq...
Sözsüz, indi çempionluq seriyasını 5-ə çatdırmaq arzusundayıq. Şübhəsiz. Hətta deyərdim ki, klubda bu sualı kimə versəz, onun da cavabı belə olacaq. Klubumuzda məni ən çox qürurlandıran da budu. Oyunçular, fizioterapevtlər, rəhbərlər və direktorlar şurasının üzvləri ardıcıl 5-ci çempionluğu arzulayırlar. Kimdən soruşsaz, eyni cavabı alacaqsız. Və bu hədəf “Vest Hem”lə matçın final fiti səsləndiyi saniyədə zərurətə çevrildi (komanda titulu premyer-liqanın sonuncu turunda bu rəqibinə 3:1 hesabı ilə qalib gəlməklə qoruyub – red.). Onda meydana çıxaraq gözümə görünən hər kəsə “əla. Fantastik nəticədi. Bu nəticə ilə fəxr edirik. Amma gərək bundan sonra seriyanı 5-ə çatdırmağa çalışaq” dediymi yaxşı xatırlayıram.

...Qvardiolanın gələcəyi...
Pepin bu klub üçün nələr etdiyini sözlə ifadə etmək çətindi. O, demək olar ki, bütün mümkün rekordları yeniləyib. Son 7 ildə premyer-liqada 6 çempionluq, həm də ardıcıl 4 çempionluq və qələbələrin sayı durmadan artır.

İngiltərə futbolu Pepin premyer-liqaya gətirdiyi oyun üslubu sayəsində dəyişib. O, həmişə klubumuza və bizimlə imzaladığı hər bir müqaviləyə bağlı olub. Onun gələcəyi ilə bağlı məsələni həmişə olduğu kimi, birlikdə həll edəcəyik (ispaniyalı baş məşqçinin müqaviləsinin müddəti 2025-ci ilin sonuna qədər nəzərdə tutulub – red.). Və şübhə etmirəm ki, həm Pepi, həm də klubu qane edəcək ən doğru qərarı verəcəyik.

...premyer-liqada maliyyə məhdudiyyətləri...
Məncə, premyer-liqa hazırkı vəziyyətə liqalar arasındakı rəqabətin ən yüksək səviyyəsi sayəsində gəlib. Bu səbəbdən premyer-liqada maliyyə məsələlərinin yenidən nizamlanmasının ən doğru şəkildə həyata keçiriləcəyinə ümid edirəm. Maliyyə məhdudiyyətlərinə balanslaşdırılmış şəkildə yanaşma premyer-liqa və ya qitənin digər bütün liqaları üçün yaxşı nəticələr verəcək.

Fikrimcə, son illər müşahidə etdiyimiz səviyyəni bundan sonra görə bilməyəcəksiz. Son 12 ayda tətbiq olunan yeni qaydalar belə düşünməyə əsas verir. Hazırda İngiltərədə hətta oyunçuların icarəsi və mübadiləsi sahəsində də çox sayda məhdudiyyətlər nəzərdə tutulub.

Beləliklə, məncə, əvvəllər klublara nəyə qadir olduqlarını göstərmək üçün imkan verilən manevr etmə indi daha çox məhdudlaşdırılıb. Bu səbəbdən hazırkı vəziyyətin artıq bu yaydan başlayaraq premyer-liqanın səviyyəsinə mənfi təsir edəcəyini düşünürəm.

...və Premyer-Liqanın MS-yə yönəltdiyi ittihamlar haqda
Əlbəttə, Premyer-Liqanın MS-yə yönəltdiyi ittihamlar bizi narahat edir (liqanın rəhbərliyi klubu 2023-cü ilin fevralında 2009/10 mövsümündən 2017/18 mövsümünə qədər 115 müxtəlif maliyyə qaydasını pozmaqda ittiham edib – red.). Futbol ictimaiyyətində bu mövzunun daim aktual olması hamımızı məyus edir. Bu səbəbdən azarkeşlərimiz və klubumuzla bağlı olan hər bir kəsə görə təəssüf edirəm.

Məncə, bir klub kimi hazırda davam edən prosesin gedişinə hörmət etməliyik. Biz bu prosesdən keçməliyik və uğurla keçəcəyik. Onu da deyim ki, bu, zənn edildiyindən uzun çəkəcək. Mövcud vəziyyət məhz bunu diqtə edir.

Bu fikri həmişə dilə gətirmişəm: gəlin, iddia və şayiələrə yox, faktlara əsasən danışaq.