“Millinin Albaniyaya qarşı oyunu heç ümid vermədi. Matçın yoldaşlıq xarakteri olduğunu düşünsək, təbii ki, nəticə önəmli deyildi. Lakin bu oyun bir daha göstərdi ki, komandamıza təcili yeni baş məşqçi təyin olunmalıdı. Arif Əsədovun heyət seçimi səhvlərdən ibarət idi. Bir çox oyunçunu öz mövqeyində oynatmırdı. Polşa kimi fiziki gücə dayanan və çətin bir liqada hər matç 90 dəqiqə oynayan Rahil Məmmədovun müdafiənin sağında oynadılması anlaşılan deyildi. Rahil LKS-də mərkəz müdafiəçisi kimi mükəmməl mövsüm keçirdi. Yarım mövsüm oynamasına baxmayaraq, qısa müddətdə polşalı azarkeşlərin sevimlisinə çevrildi. Qismətin oyuna gec qoşulması da düzgün deyildi. Hər gedişi və oyunçuları tək-tək təhlil etsəm, bu haqda səhərə qədər danışmaq olar. Arif Əsədov bu yükü daşıya bilməz. “Milliləşdirilmiş” futbolçulara gəlincə, hər biri yavaş-yavaş yola salınmalı, öz futbolumuzun yetirmələrinə şans verilməlidi. Bədavi kimi yaşı çox olan futbolçularla artıq vidalaşmaq lazımdı. Öz klublarında oynamayan futbolçular üçün bunu da mütləq qeyd edim ki, milli komanda məşq etmək üçün yer deyil. Öz klublarında oynamayanlar milli komandanın heyətinə çağrılmamalıdı”.