Dəqiqləşdi: “Araz Saatlı” evdə oynaya biləcək
Bilindiyi kimi, “Araz Saatlı” ilə “Cəbrayıl” arasında pley-offun cavab görüşü Saatlı Olimpiya İdman Kompleksində keçirilməliydi.
Lakin qarşılaşmanın yayım hüququna malik olan “CBC Sport” kanalının təftiş qrupu bir müddət öncə stadiona baxış keçirərkən bəzi nöqsanlar aşkarlamışdı. PFL isə yalnız “CBC Sport”un rəyini gözlədiyindən, cavab oyununun harda və nə vaxt keçiriləcəyini açıqlamırdı. Artıq dünən PFL oyunun keçiriləcəyi məkanı və zamanı açıqladı. Belədə başadüşülən odu ki, “CBC Sport”un iradları aradan qaldırılıb. Bir neçə gün öncə klub prezidenti Ədalət Abdullayevlə danışdıqda problemin əsasən generatorla bağlı olduğunu bildirmişdi. Artıq hər şeyin tam həllini tapıb-tapmadığını öyrənmək üçün yenidən Ədalət bəylə əlaqə saxladıq:
“Bütün problemlər həll olundu. Bu gün PFL oyunun vaxtını və yerini açıqlayıb. Oyun iyunun 15-i, saat 17.30-da Saatlıda başlayacaq. İnşallah, hər şey yüksək səviyyədə təşkil olunacaq”.
KAMAL SƏFƏR
