"Ümumi qiymətləndirsək, turnir əla keçdi. Liqada mövsüm yekunlaşandan üç gün sonra Serbiyaya - təlim-məşq toplanışına yollandıq. Dincəlməyə vaxtımız olmadı. Təbii ki, 5×5-dən sonra 3×3 basketboluna keçid həmişə çətin olur. Lakin bacardığımız qədər qısa müddətdə əlimizdən gələni etdik. Məşqçimizin tapşırıqlarını yerinə yetirməyə, var gücümüzü meydanda qoymağa çalışırdıq. Və nəticədə də bu alındı. Ən çətin matç finalda Kipr yığmasına qarşı oldu. Qrup mərhələsində də onlarla qarşılaşmışdıq, orda da çətin oyun alınmışdı. Həqiqətən çox yaxşı heyətə malikdilər. Onlar keçən il turnirdə qalib olublar. Biz bilirdik ki, İrlandiya və Kipr milliləri bu il də ən yaxşılardan biri olacaq. Elə alındı ki, yarımfinalda İrlandiyaya asanlıqla qalib gəldik. Kiprlə oyun asan olmasa da, əsas nəticədi. Axıra qədər döyüşdük. Son saniyəyə kimi bir-birimizə dəstək olduq və Avropa Kubokuna vəsiqəni əldə etdik".

"Uğurlu çıxış etdik. Xüsusilə hücumda oyunumuz yaxşı alındı. Final çox gərgin keçsə də, qalib gəlməyi bacardıq. Buna görə çox sevincliyik. Avropa Kubokunda ölkəmizi layiqincə təmsil etmək istəyirik".