“Qarabağ” indikindən güclü heyət formalaşdırmaq üçün işə başlayıb.

Azərbaycan futbolunda yeni tarix yazan, Avropada şöhrət qazanan “köhlən atlar” legionerləri “ələkdən keçirməyə” başlayıb. Ağdam təmsilçisi ilk növbədə fransalı yarımmüdafiəçi Adama Diakabi ilə vidalaşdı.

2023-cü ilin yanvarından "Qarabağ"da çıxış edən Diakabi 33 matçda 7 qol vurub. O, premyer-liqada 24 (beş qol), ölkə kubokunda 2 (iki qol), avrokuboklarda 7 oyun keçirib. Adama oyunu ilə nəinki azarkeşlərin, hətta rəqib klubların da diqqətini cəlb etmişdi. Bir neçə ay əvvəl, daha dəqiq desək, 24-cü turun “Sumqayıt”-“Qarabağ” qarşılaşmasından sonra meydan sahiblərinin baş məşqçisi Samir Abasovun “Adama Diakabinin maaşı mənim futbolçularımın hamısının maaşından üstündü. Əsas heyət üzvü deyilsə, Diakabini bizə versinlər” demişdi. Son ilyarımda “Qarabağ”ın düşərgəsində olan fransalının klubdan ayrılmasını azarkeşlər də birmənalı qarşılamayıb. Belə ki, klubun rəsmi səhifəsində yer alan ayrılıq postuna “adamı boş yerə “rasxoda verdilər”, heyif bu cür oyunçudan. Hər oyuna çıxanda ya qol vurur, ya da assist edirdi. Keytaya verilən şans buna verilsəydi, tam başqa cür ola bilərdi. Bu adam Mbappenin yerini doldurmaq üçün “Monako”ya alınmışdı, yəni o cür potensial var bu futbolçuda”, “Diakabi kimi oyunçunu heyf, çox oynatmadılar, potensialı vardı, ilk əvvəllər özünü göstərdi, sonra nədənsə çox oynamadı”, “niyə gəldi, niyə getdi, bir Qurban müəllim bildi, bir də Adama. Bəlkə də heç özü də bilmədi. Mənim buna ümüdün çox böyük idi. Sürəti və dəqiq zərbələri yaxşı idi. Amma şans vermək lazım idi”, “Musa Qurbanlıdan, Nərimandan min dəfə keyfiyyətli oyunçu idi” kimi onlarla rəy yazılmışdı. Bəs futbolçunun “Qarabağdan getməsinə nə səbəb oldu?

Daha dəqiq məlumat almaq üçün suallarımızı birbaşa Adama Diakabiyə ünvanladıq.
- Azərbaycandakı fəaliyyətini bitirdin. Əvvəlcə bununla bağlı təəssüratını bilmək istərdim.
- Şəxsi baxımdan çox gözəl vaxtlar keçirdim. Azərbaycan barədə təəssüratlarım çox yüksəkdi. Orda bir ildən çox yaşadım. Düşünürəm ki, idman baxımından daha yaxşı ola bilərdi.

- “Qarabağ”dan ayrılmağının səbəbin nə oldu? Belə ayrılığa hazır idin, yoxsa sənin üçün də gözlənilməz oldu?
- Sadəcə, müqaviləmin müddəti başa çatdı. Heç bir tərəf bunu uzatmaq istəmədi. Məncə, bu qərar hamı üçün uyğun oldu. Onlara da uğurlar arzulayıram.

- “Qarabağ”da iki dəfə çempion oldun, kubok qazandın.
- Çox yaxşı təcrübə olduı. Və bu mövsüm iki mükafat qazandığım üçün xoşbəxtəm. Komandada mövsüm hamı üçün gözəl keçdi. Yeni uğurlara imza atıldı. Sevinirəm ki, bu uğurların bir parçası olmuşam.

- “Qarabağ”a gələndə təəssüratın necə idi, indi necədi?
- Yaxşı, ancaq müsbət təəssüratlar var. “Qarabağ” əvvəllər onsuz da tanınırdı. Avropa komandaları ilə duellərdə mərhələ keçəndə daha çox şöhrət qazandı. Bu çətinliyin öhdəsindən gəlmək həyəcanverici idi.

- Ümumiyyətlə, Azərbaycan çempionatını necə görürsən, nə yaxşıdı, nəyi dəyişmək lazımdı?
- Düşünürəm ki, çempionat ümumilikdə son illərlə müqayisədə yaxşılaşıb. Lakin hələ görüləsi işlər var. Oyunların daha maraqlı keçməksi üçün stadiona çox tamaşaçı cəlb etmək lazımdı.

- Komandada forma geydiyin müddətcə yerli və əcnəbi futbolçulardan kimlərlə dost münasibəti qurdun?
- Bütün komanda üzvləri ilə (gülür). “Qarabağ” bir kollektivdi. Ora daxilsənsə, hər kəslə münasibət qurursan. Yəni isti münasibəti çox gördüm.

- Yenidən Azərbaycanda oynamalı olsaydın, hansı klubla müqavilə bağlayardın?
- Bilirəm, maraqlanan var. Amma daha heç nə deməyəcəyəm. Nə vaxt belə bir şey olsa, xəbər tutacaqsız.

- Hazırda danışıq apardığın Azərbaycan və ya başqa ölkə klubu var?
- Nəyin daha yaxşı olduğunu düşünmək üçün vaxta ehtiyacım var.

- Sonda azarkeşlərə nə demək istərdin?
- Azarkeşlərə və məni sevənlərə ürəkdən təşəkkür etmək istəyirəm. Həmçinin dəstəklərinə görə onları sevdiyimi deyin.

RÖYANƏ OĞUZ