“Qarabağ” qış fasiləsində hələ ki yalnız bir futbolçu transfer edib.

Söhbət fransalı Adama Diakabidən gedir. 26 yaşlı vinger 1996-cı ildə Fransanın Ayaçço şəhərində doğulub. Lakin Adamanın əsli Seneqaldandı, sadəcə, Fransada doğulub boya-başa çatıb. Karyerasına da elə ölkəsinin “Kan” klubunda başlayıb. Burda 19 yaşadək futbolçulardan ibarət komandada çıxış etdikdən sonra əvəzedici heyətə cəlb olunub. Nə qədər qəribə olsa da, 2014-cü ildə klubsuz qalıb. O, 6 ay sonra “Renn”in ikinci komandasında çıxış etməyə başlayıb. Bundan sonra futbolçunun karyerasında yüksəliş başlayıb. “Renn”in əvəzedici komandasında 4, əsas heyətində 29 matçda meydana çıxıb. Burda 5 qol vurmağı bacarıb. 2018-ci ilin iyulunda 10 milyon avro qarşılığında “Monako”ya transfer olunub. Həmin mövsüm Kilian Mbappe “knyazlıq klubu”ndan PSJ-yə keçmişdi. Sol cinah vingeri həmin vaxt ona əvəzedicisi kimi transfer olunsa da, burda işləri yaxşı getməyib. Diakabi 30 matçda 3 qol vurub, 3 məhsuldar ötürmə ilə yadda qalıb. “Monako” rəhbərliyi bu səbəbdən onu 10 milyon avroya “Haddersfild”ə satıb. Yeni komandasında 48 görüşdə meydanda çıxsa da, fərqlənə bilməyib. Lakin 4 məhsuldar ötürmə ilə yadda qalıb. Klub onu çempionşipdə çıxış edən “Nottingem Forest”ə icarəyə göndərib. Diakabi burda 14 qarşılaşmada meydana çıxmaq şansı qazansa da, heç nə ilə yadda qalmayıb...

2021-ci ilin fevralından isə “Amyen”də çıxış etməyə başlayıb. Burda da vingerin işləri qaydasında olmayıb. 26 qarşılaşmada meydana çıxsa da, 1 qol vurub, 2 məhsuldar ötürmə verib. Zədələr də əsas heyətdə möhkəmlənməsinə mane olub. Fransa klubu 2022-ci ilin iyulunda onunla yeni müqavilə bağlamayıb. Bu səbəbdən də 26 yaşlı vinger 7 ay klubsuz qalıb. Əslində isə o, “Qarabağ”la danışıqlar aparıb. Lakin futbolçunun meneceri bəzi şərtlərdə klubla razılaşmadığı üçün anlaşa bilməyiblər. Özünün açıqlamasına görə, yayda Bakıya gəlib, baza ilə tanış olub. Abdulla Zubirlə komanda haqda söhbətləşib. Nəyə görə vinger? Hamı bilir ki, Zubir fransalıdı. Diakabinin onunla danışması normaldı. Lakin həqiqət belə deyil. Hər iki futbolçu “Football Life Management Sarl” menecer şirkətinə məxsusdu. Bu səbəbdən də Diakabi Zubirlə danışıb. Buna rəğmən, Ağdam təmsilçisiylə menecerinin təkidi ilə müqavilə bağlamayıb. Yay “transfer pəncərəsi” başa çatsa da, Diakabi özünə klub tapa bilməyib. Bu üzdən də 7 ay futbolsuz qalıb. Sonradan “Qarabağ”la bütün şərtlərdə razılıq əldə olunub. Beləcə vinger Ağdam klubu ilə 2025-ci ilin iyuluna qədər rəsmi müqavilə bağlayıb.

Diakabi Fransanın potensiallı oyunçularından sayılırdı. O, ölkəsinin 21 yaşadək futbolçulardan ibarət komandasında da çıxış edib. Həmin dövrdə 4 qarşılaşmada meydana çıxıb. O zaman Fransa U-21-nin heyətində Benjamin Pavar, Tanquy Ndombele, Lukas Tousart, Lukas Ernandes, Abdu Diallo kimi dünya ulduzları çıxış edirdi. Bir sözlə, “Qarabağ” olduqca potensiallı futbolçunu heyətinə qatıb. Diakabi bu şansdan istifadə etsə, qısa müddətdə Avropa nəhənglərinin diqqətini çəkə bilər.

İLKİN SULTANLI