Ötən yay hay-küylü şəkildə “Fənərbaxça”dan “Real”a keçən Arda Gülər üçün İspaniyanın paytaxtında ilk mövsüm başa çatdı.

“Football-plus.az” xəbər verir ki, gənc türkiyəli ulduzun ilk mövsümünə birmənalı qiymət vermək çətindi. Solaxay futbolçu bir tərəfdən mövsümün böyük hissəsində müxtəlif səbəblər üzündən komandaya yardım edə bilmədi. 2023/24-də o, cəmi 12 rəsmi oyuna çıxaraq 6 qolluq fayda verdi. Çempionlar Liqasında isə bir dəqiqə də meydana çıxmadı. Amma digər tərəfdən, Arda ÇL də daxil olmaqla mövsümü 3 titulla tamamladı! Türkiyəli futbolçu öz səhifəsindəki paylaşımında bunları yazdı:

Ən əsası Arda Gülər ÇL kubokunu başı üzərinə qaldıran ilk türkiyəli futbolçu oldu. Bu mövzuya bir qədər geniş toxunmağa ehtiyac var. Çünki sosial şəbəkələrdə bununla bağlı çoxlu yalan məlumat dolaşır. Əvvəla qeyd edək ki, Arda Gülərin mövsüm ərzində bir dəqiqə belə oynamadığı üçün UEFA tərəfindən şəkildə ÇL-in qalibi hesab olunmaması barədə deyilənlər cəfəngiyyatdı. UEFA-nın bununla bağlı heç bir rəsmi qərarı yoxdu (oxucularımızdan kiminsə əlində UEFA-nın bununla bağlı rəsmi qərarının olmasına dair sübut varsa, həmin şəxsləri redaksiyamıza dəvət edirik). ÇL medalını boynundan asan futbolçunun bu turnirin qalibi sayılmaması mümkün deyil. Ardanın bu turniri qazanan ilk türkiyəli olmasına da sosial şəbəkələrdə sübhə ilə yanaşanlar var. Bir çoxları Berkant Göktanın 2000/01-də “Bavariya” ilə ÇL-in qalibi olmasını “gözə soxur”. Bəli, sonradan “Qalatasaray” və “Beşiktaş”da da top qovmuş Berkant həmin mövsüm həqiqətən də Münhen nəhənginin heyətində yer alırdı. Amma qürbətçi futbolçu 2000/01-də “Bavariya”nın əsas yox, ikinci komandasında çıxış edib. Həmin mövsüm ÇL-də onun adı yalnız bir dəfə iştirak ərizəsinə düşmüş və o, heç bir matçda meydana çıxmamışdı. Amma burda əsas meyar yığma məsələsidi. Berkant Türkiyənin aşağı yaş qruplarında ümumilikdə 64 dəfə meydana çıxıb. Hətta 2000-ci ilin oktyabrında paytaxtımızda gənclər yığmamızın da qapısına yol tapıb. Amma Berkant heç vaxt Türkiyənin əsas yığmasına dəvət almayıb! Arda Güləri də fərqləndirən əsas məqam onun Türkiyə yığmasının şərəfini qoruyaraq ÇL-i qazanan ilk futbolçu olmasındadı! Ardaya qədər “ay-ulduzlular”ın heç bir üzvü bunu bacarmamışdı. Srağagün “Real”ın ÇL-dəki qələbəsinə həsr olunmuş tədbirdə Madrid küçələrinə 500 mindən çox insan axışdı. Həmin tədbirdə maraqlı bir olay yaşandı. Ançelotti mikrofonu əlinə alaraq “sizi çox özəl bir futbolçu ilə tanış edəcəm, Arda Gülər” ifadəsini işlətdi. Məşqçisindən mikrofonu qəbul edən Arda isə bir qədər utancaq formada ispan dilində “salamlar, madridista, biz bir ailəyik, hər şey üçün təşəkkürlər” deyərək Ançelotti ilə qucaqlaşdı.