“Qarabağ” 2023/24 mövsümünü “qızıl dubl” ilə bitirdi.

Kuboku ağdamlılar başı üzərinə qaldıırsa da, “Zirə” də ən azı onlar qədər fədakarlıq etdi. Oyundan sonra “qartallar”ın kapitanı Qismət Alıyevlə danışdıq.

- Komandan meydanda son ana qədər vuruşdu. Bir kapitan kimi nəticənin ədalətli olduğunu düşünürsən?
- Düşünürəm ki, həm azarkeşlər, həm də hər iki komanda üçün maraqlı oyun oldu. Bu məğlubiyyətə layiq deyildik. İkinci hissədə vacib qol fürsətlərimiz oldu, amma maksimum yararlana bilmədik. Nəticədən asılı olmayaraq, yaxşı matç keçdi. Qarşıdan gələn Avroliqa oyunları üçün bundan nəticə çıxarıb, tam yaxşı hazıraşacağıq.

- Rəqibin ilk qoluna qədər müdafiədə daha inamlı təsir bağışlayırdız. Sonra nə baş verdi?
- Oyunlarına baxarkən "Qarabağ"ın standart vəziyyətlərdə təhlükəli olduğunu düşünmürdük. Zubir fərqləndi. Hər iki epizodda daha diqqətli olmalıydıq. Qarşıda belə səhvlərin üzərində işləyəcəyik.

- Hiss olunurdu ki, rəqibi yaxşı təhlil etmisiz. Planlarınızı pozan nə oldu?
- Hər saniyə bilirdik ki, cüzi bir boşluq verəndə ondan istifadə edirlər. Birinci hissənin sonlarında cüzi səhv oldu və ondan yaralandılar. İkinci hissədə komandamız yaxşı çıxış etdi. Sadəcə, sonluğu gətirə bilmədik.

- Kubokdakı və çempionatdakı oyunlarınızı tərəziyə qoyanda hansı daha ağır gəlir?
- Çempionatdakı son 5-6 tur finala bərabər oyunlar idi. Bu nəticələrlə finala gəldik. Bu gün də düşünmürəm ki,"Qarabağ"dan geri qaldıq. Sadəcə, şans onların yanında oldu.

- Qarşıdan avrokubok oyunları gəlir. Bu barədə danışmaq hər nə qədər tez olsa da, nə düşünürsən?
- Püşkatmadan sonra daha ətraflı danışmaq olar. "Qarabağ" kimi rəqiblə belə mübarizə aparır, geri qalmırıqsa, yaxşı olacaq. Rəqibin kimliyindən aslı olmayaraq, heç bir komandadan geri qalmarıq. Bacardıgımız qədər mərhələ atlamağa çalışacağıq. 10 gün sonra istirahətdən qayıdacağıq. Bir kapitan kimi əlimdən nə gələcəksə, etməyə hazıram.

RÖYANƏ OĞUZ