Matçın önəmi kiçikdən böyüyə hər kəsə bəlli idi. Avrokuboklar uğrunda mübarizənin daha bir qalibinə "Neftçi Arena"da aydınlıq gələcəkdi.

Əlbəttə, matçın "doğma divarlar" arasında keçirilməsi "Neftçi"yə sərf edirdi. Komandalar arasında 1 xal fərqi var idi, “ağ-qaralar” “bayquşlar”dan öndəydi.

Artıq 3-cü dəqiqədə qonaqlar hesabı açmağa yaxın oldu. Tellur Sekidikanın ötürməsini "çərçivə"dən keçirə bilmədi. Az sonra Ayaz uzaq məsafədən qeyri-dəqiq zərbə ilə yadda qaldı. "Bayquşlar"ın növbəti fürsətini dəyərləndirə bilməyən yenə Tellur oldu. Təcrübəli yarımmüdafiəçi Sekidikanın ötürməsindən sonra topa toxunsa da, istəyinə çatmadı. Çünki Brkiç yerinə idi. Açıq-aşkar heç-heçə üçün oynayan "ağ-qaralar" ilk təhlükəli vəziyyəti 18-ci dəqiqədə yaratdı. Lakin bu dəfə də Ozobiç Lebonun ötürməsindən faydalana bilmədi - top qapının üstündən keçdi. Ümumiyyətlə, hər iki komanda hesabı erkən açmağa tələsirdi. 43-cü dəqiqədə "bayquşlar"ın növbəti cəhdi uğursuz alındı. Brkiçin Sekidikanın zərbəsini dəf etməsi 1-ci hissənin sonuncu təhlükəli epizodu oldu.

2-ci yarı daha gərgin mübarizə vəd edirdi ki, belə də oldu. Namik 48-ci dəqiqədə Brkiçə çətin anlar yaşatdı. "Neftçi"nin qorxu yaşadığı başqa epizodun səbəbkarı isə Koffi oldu. Fransalı Sekidikayla mübarizədə səhvə yol verdiyindən "bayquşlar" hesabı aça bilərdi. Lakin Cessenin qeyri-dəqiq zərbəsi qonaqları üzdü. Bir qədər sonra Caber uzaq məsafədən bəxtini sınasa da, Yusif qola imkan vermədi. Ardından hücum xəttində fəallaşan Masazır təmsilçisi Parrisin üzündən sevinə bilmədi. Yamaykalı yarımmüdafiəçi ilk fürsətdə qapını nişan ala bilmədisə, ikincidə Brkiç özünü yaxşı tərəfdən göstərdi. Namikin 83-cü dəqiqədəki zərbəsini də xorvatiyalı qolkiper dəf etdi. Heç-heçənin sərfəli olmadığını dərk edən "bayquşlar" hücumları sıraladı. Nəhayət, 87-ci dəqiqədə meydan sahiblərini şoka salan qol vuruldu. Çakla daha əlverişli mövqedə olan Namikin fərqlənməsinə şərait yaratdı. Ardından tərəflər arasında anlaşmazlıq yarandı. Daha dəqiq desək, rəqib futbolçuların söz atışması şiddətləndi. Nəticədə Əliyar Ağayev çıxış yolunu qırmızı vərəqələri sıralamaqda tapdı. İş o yerə çatdı ki, növbəti dəqiqələrdə "Neftçi" 10, "Sabah" 9 futbolçuyla mübarizəyə davam etdi. Matçın final fiti Eminin topun qapının üzərindən keçən zərbəsindən sonra çalındı. Beləliklə, "Neftçi" mövsümü 5-ci pillədə bitirdi və 2017/18 mövsümündən bəri ilk dəfə avrokuboklardan kənarda qaldı. "Sabah" isə ardıcıl 2-ci dəfə bu hüququ qazandı.

Gözdən qaçmadı
* "Forza Neftçi", "Neftçi Baku", "Soldati di Sabah" və "Fratelli del Sabah" fanklunları komandalarını sona qədər dəstəklədi. "Ağ-qaralar"ın məğlubiyyəti rəsmiləşdikdən sonra "Neftçi" azarkeşləri “istefa” şüarları səsləndirdi. "Sabah" qələbəni azarkeşləriylə birgə qeyd etdi.
* Bojoviç hakimləri təhqir etdiyinə görə 90+2-ci dəqiqədə qırmızı vərəqə aldı. “Neftçi”nin ertəsi monteneqrolu mütəxəssislə yolları ayırdığını nəzərə alsaq, bu, onun ölkəmizdəki son cəzası idi.

KƏNAN BAHADIR